माजी आमदार दिगंबर भेगडे यांचे निधन

पुणे: मावळ तालुक्याचे माजी आमदार दिगंबर बाळोबा भेगडे (वय 75 ) यांचे गुरुवारी दुपारी हृदय विकाराने निधन झाले. भेगडे यांना छातीत दुखत असल्याने गुरूवारी सकाळी सोमाटणे येथील खासगी रुग्णालयात उपचारासाठी दाखल करण्यात आले होते. मात्र दुपारी अडीचच्या सुमारास ते मरण पावले. वारकरी सांप्रदायिक क्षेत्रात असल्याने ‘ पंढरीचा वारकरी, विधानसभेचा मानकरी’ अशी घोषणा एकेकाळी गाजली होती.

मावळ विधानसभा मतदार संघातून भाजपचे उमेदवार म्हणून त्यांनी 1999 व 2004 अशा दोन वेळा विजय मिळवला होता. त्यापूर्वी त्यांनी मावळ पंचायत समितीचे उपसभापती पद भूषविले होते. त्यांनी भाजप पक्ष संघटनेत विविध पदांवर काम केले होते. पक्षाचे तालुकाध्यक्ष व जिल्हाध्यक्ष म्हणून जबाबदारी सांभाळली होती.