जागर मराठीचा –जल्लोष कवितेचा, महानगरपालिकेच्यावतीने गुरुवारी कवि संमेलनाचे आयोजन

पनवेल: जागर मराठीचा –जल्लोष कवितेचा” मराठी भाषा संवर्धन पंधरवड्याच्या पार्श्वभूमीवर आयुक्त मंगेश चितळे यांच्या मार्गदर्शनाखाली सहा फेब्रुवारीला दुपारी 4 वाजता मान्यवर कवींच्या कवि संमेलनाचे आयोजन आद्य क्रांतिवीर वासुदेव बळवंत फडके नाट्यगृहात करण्यात आले आहे.

मराठी भाषेचे सौंदर्य,काव्य सौंदर्य उलगडून दाखविणाऱ्या या “जागर मराठीचा –जल्लोष कवितेचा” या कार्यक्रमामध्ये उपरोधाच्या माध्यमातून गंभीर समाजचिंतन करायला लागणारे महाराष्ट्राचे दिग्गज कवि अशोक नायगांवकर आपल्या कविता सादर करणार आहेत. याबरोबरच कुठे तरी भेटलेले जीव जिव्हाळ्याचे झाले… घरातले ओळखीचे किती दूर दूर गेले अशा धीर गंभीर कवितेतून नाजूक कोमल भावना व्यक्त करणारे कवि प्रशांत मोरे, तर दुसऱ्या भाषेने पैसा, संपत्ती सारं सारं काही दिलं… पण अमृताशी पैजा जिंकणाऱ्या मराठीने जगण्याचे “चीज” केले अशी मराठीची स्तुती करणारे कवि डॉ. विजय देशमुख आणि कवयित्री डॉ. स्मिता दातार, मृणाल केळकर, महानंदा मोहिते आपल्या कविता सादर करणार आहेत.

काव्यवाचन स्पर्धा

पनवेल महानगरपालिका अंतर्गत अधिकारी व कर्मचाऱ्यांच्या काव्य प्रतिभेला चालना देण्यासाठी तसेच त्यांच्यातील सुप्त कलागुणांना वाव देण्यासाठी 6 फेब्रुवारीला दुपारी 3 वाजता ‘कविता वाचन’ स्पर्धेचे आयोजन करण्यात आले आहे. या कवी संमेलनालाचा लाभ इच्छुकांनी जरूर घ्यावा. असे आवाहन पालिकेच्या वतीने करण्यात येत आहे.