‘पहिले येणाऱ्यास पहिले प्राधान्य’ तत्त्वावर म्हाडाकडून २९५ सदनिकांची विक्री

पुणे: महाराष्ट्र गृहनिर्माण व क्षेत्रविकास प्राधिकरण (MHADA) अंतर्गत पुणे गृहनिर्माण व क्षेत्रविकास मंडळाने सर्वसाधारण प्रवर्गातील गरजू व पात्र नागरिकांसाठी २९५ सदनिकांच्या विक्रीसाठी जाहिरात प्रसिद्ध केली आहे. या सदनिकांचे वितरण ‘प्रथम येणाऱ्यास प्रथम प्राधान्य’ या तत्त्वावर ऑनलाइन पद्धतीने करण्यात येणार आहे.

म्हाडाचे मुख्याधिकारी राहुल साकोरे यांनी दिलेल्या माहितीनुसार, या सदनिका १५ टक्के सामाजिक गृहनिर्माण योजना आणि २० टक्के सर्वसमावेशक योजनेअंतर्गत आहेत. यापूर्वी काढण्यात आलेल्या सोडतीनंतर मागणीअभावी रिक्त राहिलेल्या सदनिकांची ही विक्री प्रक्रिया आहे.

विकासकांकडून प्राप्त अहवालानुसार, पारदर्शकतेच्या दृष्टीने ऑनलाइन अर्ज नोंदणी प्रक्रिया सुरू करण्यात आली असून पात्र अर्जदारांना प्राधान्याने सदनिका दिल्या जाणार आहेत. इच्छुक नागरिकांनी म्हाडाच्या अधिकृत संकेतस्थळावर अर्ज करणे आवश्यक आहे.

दरम्यान, सोडतीनंतरही विक्रीअभावी शिल्लक राहणाऱ्या सदनिका पुढील काळात उपलब्ध होताच त्यांची पडताळणी करून ‘प्रथम येणाऱ्यास प्रथम प्राधान्य’ या तत्त्वावरच वाटप करण्यात येणार असल्याचेही स्पष्ट करण्यात आले आहे.