शिक्षकेतर कर्मचाऱ्यांची भरती आता पवित्र पोर्टलवरून

संभाजीनगर: महाराष्ट्रातील खासगी अनुदानित शैक्षणिक संस्थांमधील शिक्षकेतर कर्मचाऱ्यांच्या भरतीमध्ये आता मोठा बदल होणार आहे! लवकरच प्रयोगशाळा सहाय्यक, कनिष्ठ लिपिक आणि ग्रंथपाल यांसारखी पदे देखील ‘पवित्र पोर्टल’ द्वारे भरली जातील. शालेय शिक्षण विभागाने तसा प्रस्ताव शासनाकडे सादर केला आहे.

सध्या राज्यात सुमारे २५,००० शिक्षकेतर कर्मचारी पदे मंजूर आहेत, त्यापैकी ९,५०० ते १०,००० पदे रिक्त आहेत. ही भरती २०२४-२५ च्या संचमान्यतेनुसार केली जाईल. त्यामुळे रिक्त आणि अतिरिक्त पदांची नेमकी आकडेवारी लवकरच समोर येईल.

महत्वाचा पेच: १५ मार्च २०२४ रोजीच्या पटसंख्येच्या सुधारित शासन निर्णयाविरुद्ध उच्च न्यायालयात याचिका दाखल झाली आहे आणि त्यावर *’स्टेटस को’ (जैसे थे)* ठेवण्यात आला आहे. त्यामुळे, शिक्षकेतर कर्मचाऱ्यांची भरती न्यायालयाच्या अंतिम निकालानंतरच होईल, असे अधिकाऱ्यांनी स्पष्ट केले आहे.

माध्यमिक शाळांमध्ये ८,५०० शिक्षकांची भरती सुरू

दरम्यान, खासगी अनुदानित माध्यमिक शाळांमधील शिक्षकांची भरती सध्या जोरात सुरू आहे. प्रत्येक पदासाठी १० उमेदवारांना मुलाखतीसाठी संस्थांमध्ये पाठवले आहे. या टप्प्यात साधारणत: ८,५०० शिक्षकांची भरती होणार असून, ३० जूनपर्यंत त्यांची नियुक्ती करण्याचे नियोजन असल्याची माहिती शिक्षण आयुक्तांनी दिली.

संस्थांनाच भरावी लागणार शिपाई पदे

शासनाच्या निर्णयानुसार वर्ग-४ मधील पदभरती आता बंद झाली आहे. त्यामुळे शैक्षणिक संस्थांमधील शिपाई पद यापुढे शासनाच्या अनुदानावर भरता येणार नाही. हे पद कायमचे रद्द झाल्याने, शाळांमधील शिपायांची कामे करण्यासाठी संबंधित शैक्षणिक संस्थांना स्वत:हून शिपाई पदे भरावी लागतील. यासाठी शासनाकडून कोणतेही अनुदान दिले जाणार नाही, असेही अधिकाऱ्यांनी स्पष्ट केले आहे.