लाडकी बहीण योजनेचा जानेवारी हप्ता रखडला; फेब्रुवारीत ₹१५०० जमा होण्याची शक्यता

मुंबई: जानेवारी महिना संपत आला असतानाही राज्यातील लाखो महिलांना लाडकी बहीण योजनेचा जानेवारीचा हप्ता अद्याप मिळालेला नाही. महिन्याचा शेवटचा आठवडा सुरू झाला असतानाही महिलांच्या खात्यात पैसे जमा न झाल्याने लाभार्थी महिलांमध्ये संभ्रम आणि नाराजीचे वातावरण आहे.

लाडकी बहीण योजनेअंतर्गत दरमहा ₹१५०० महिलांच्या खात्यात जमा केले जातात. मात्र, यंदा डिसेंबरचा हप्ता उशिरा मिळाल्यानंतर आता जानेवारीचाही हप्ता रखडल्याचे चित्र आहे. दरम्यान, जानेवारी महिन्यात हा हप्ता मिळण्याची शक्यता कमी असून फेब्रुवारी महिन्यातच रक्कम जमा होण्याची शक्यता वर्तवली जात आहे.

फेब्रुवारीच्या पहिल्या आठवड्यात पैसे येण्याची शक्यता

सूत्रांकडून मिळालेल्या माहितीनुसार, फेब्रुवारीच्या पहिल्या आठवड्यात महिलांच्या खात्यात जानेवारीचा हप्ता जमा केला जाऊ शकतो. मात्र, याबाबत अद्याप शासनाकडून कोणतीही अधिकृत घोषणा करण्यात आलेली नाही. त्यामुळे महिलांना अद्याप प्रतीक्षाच करावी लागत आहे.

जिल्हा परिषद निवडणुकीपूर्वी हप्ता मिळण्याची शक्यता

राज्यातील जिल्हा परिषद आणि पंचायत समितीच्या निवडणुका ५ फेब्रुवारी रोजी होणार आहेत. निवडणुकीपूर्वी महिलांच्या खात्यात लाडकी बहीण योजनेचा हप्ता जमा होण्याची शक्यता आहे. यापूर्वी महापालिका निवडणुकांच्या आधीही महिलांच्या खात्यात पैसे जमा करण्यात आले होते. त्यामुळे यावेळीही मतदानापूर्वीच ₹१५०० जमा होऊ शकतात, अशी चर्चा राजकीय वर्तुळात सुरू आहे.

केवायसी अडचणींमुळे हप्ता रखडल्याचा अंदाज

लाडकी बहीण योजनेतील अनेक लाभार्थी महिलांच्या केवायसी प्रक्रियेत अडचणी आल्यामुळे पैसे जमा झाले नसल्याचे समोर आले आहे. यावर तोडगा काढण्यासाठी आता महिलांची प्रत्यक्ष केवायसी केली जाणार असून अंगणवाडी सेविका घरोघरी जाऊन कागदपत्रांची पडताळणी करणार आहेत. केवायसी पूर्ण झाल्यानंतरच थकीत हप्ते जमा केले जाणार असल्याची माहिती आहे.दरम्यान, लवकरच याबाबत अधिकृत घोषणा होण्याची शक्यता असून महिलांचे लक्ष आता फेब्रुवारीच्या पहिल्या आठवड्याकडे लागले आहे.