जलसंवर्धन रील्स स्पर्धेला ३१ ऑगस्टपर्यंत मुदतवाढ

मुंबई : माजी मुख्यमंत्री स्वर्गीय सुधाकरराव नाईक यांच्या कार्याला अभिवादन म्हणून २१ ऑगस्ट रोजी राज्यभर ‘जलसंधारण दिन’ साजरा करण्यात येणार आहे. या पार्श्वभूमीवर मृद व जलसंधारणाबाबत जनजागृती करण्यासाठी आयोजित ‘महा वॉकेथॉन–वॉक फॉर वॉटर’ आणि ‘मृद व जलसंवर्धन रील्स स्पर्धे’ला नागरिकांचा उत्स्फूर्त प्रतिसाद मिळत आहे. या प्रतिसादाची दखल घेत रील्स स्पर्धेसाठी रील्स अपलोड करण्याची अंतिम मुदत आता ३१ ऑगस्ट २०२६ पर्यंत वाढविण्यात आली आहे, अशी माहिती मृद व जलसंधारण मंत्री संजय राठोड यांनी दिली.

नागरिक, विद्यार्थी आणि युवकांमध्ये मृद व जलसंवर्धनाबाबत जनजागृती व्हावी तसेच या क्षेत्रातील नाविन्यपूर्ण उपक्रमांना प्रोत्साहन मिळावे, या उद्देशाने रील्स स्पर्धेचे आयोजन करण्यात आले आहे. यापूर्वी रील्स अपलोड करण्यासाठी १९ ऑगस्टपर्यंत मुदत देण्यात आली होती.

क्षेत्रीय स्तरावर स्पर्धेला मिळालेला प्रतिसाद आणि रील्स तयार करून अपलोड करण्यासाठी कमी कालावधी लक्षात घेता मुदतवाढ देण्याची मागणी करण्यात आली होती. त्यानुसार अंतिम मुदत ३१ ऑगस्टपर्यंत वाढविण्याचा निर्णय घेण्यात आला आहे.

‘माती वाचवा, पाणी जपा, सुरक्षित भविष्य घडवा’ या संदेशातून नागरिकांनी अभियानात सहभागी व्हावे आणि आपल्या सर्जनशीलतेच्या माध्यमातून मृद व जलसंधारणाचा संदेश अधिकाधिक लोकांपर्यंत पोहोचवावा, असे आवाहन मंत्री संजय राठोड यांनी केले.

दरम्यान, २१ ऑगस्ट रोजी राज्यभर होणाऱ्या ‘महा वॉकेथॉन–वॉक फॉर वॉटर’मध्ये नागरिकांनी मोठ्या संख्येने सहभागी होऊन जलसंधारणाच्या लोकचळवळीला बळ द्यावे, असे आवाहनही करण्यात आले आहे.