पाण्याचा अंदाज चुकला अन्न पवना धरण परिसरात तरुणाचा बुडून मृत्यू

पुणे: मावळ तालुक्यातील पवना धरण परिसरात घडलेल्या एका दुर्दैवी घटनेने संपूर्ण परिसरात शोककळा पसरली आहे. धरणात बुडून २४ वर्षीय तरुणाचा मृत्यू झाला असून ऋतिक कैलास साखरे असे मृत तरुणाचे नाव आहे. ही घटना गुरुवारी दुपारच्या सुमारास घडली.

मिळालेल्या माहितीनुसार, ऋतिक साखरे हे आपल्या काही मित्रांसह पर्यटनासाठी पवना धरण परिसरात आले होते. निसर्गरम्य वातावरणाचा आनंद घेत असताना सर्वजण धरणाजवळ थांबले. दरम्यान, पोहण्यासाठी धरणात उतरलेल्या ऋतिक यांना पाण्याची खोली आणि प्रवाहाचा अचूक अंदाज आला नाही. पुढे जात असताना ते खोल पाण्यात गेले आणि काही क्षणांतच बुडू लागले. मित्रांनी त्यांना वाचविण्याचा प्रयत्न केला; मात्र प्रयत्न अपयशी ठरले.

घटनेची माहिती मिळताच स्थानिक नागरिकांनी प्रशासनाला कळवले. त्यानंतर वन्यजीव रक्षक मावळ संस्थेचे बचाव पथक, स्थानिक पोलीस आणि ग्रामस्थांनी संयुक्तपणे शोधमोहीम हाती घेतली. काही तासांच्या अथक प्रयत्नांनंतर ऋतिक यांचा मृतदेह पाण्याबाहेर काढण्यात आला. मृतदेह शवविच्छेदनासाठी नजीकच्या रुग्णालयात पाठविण्यात आला असून पुढील तपास पोलीस करत आहेत.

कुटुंबीयांवर दुःखाचा डोंगर

या घटनेमुळे साखरे कुटुंबीयांवर दुःखाचा डोंगर कोसळला असून परिसरात हळहळ व्यक्त केली जात आहे. तरुण वयात घडलेल्या या दुर्घटनेने मित्रपरिवार आणि स्थानिक नागरिक शोकाकुल झाले आहेत.

धरण परिसरात खबरदारीचे आवाहन

पवना धरण परिसरात पर्यटनासाठी मोठ्या संख्येने पर्यटक येत असतात. मात्र, पाण्याची खोली, अचानक वाढणारा प्रवाह आणि सुरक्षेच्या अभावामुळे अशा दुर्घटना वारंवार घडत असल्याचे दिसून येते. प्रशासनाने नागरिकांना धरण परिसरात फिरताना तसेच पाण्यात उतरताना योग्य ती खबरदारी घेण्याचे आवाहन केले आहे.

पोहण्यासाठी अधिकृत आणि सुरक्षित ठिकाणांचाच वापर करावा, मद्यपान करून पाण्यात उतरू नये तसेच आवश्यक सुरक्षासाधनांसहच पाण्यात उतरावे, असे आवाहन करण्यात आले आहे. निष्काळजीपणामुळे होणाऱ्या दुर्घटना टाळण्यासाठी प्रत्येकाने जबाबदारीने वागणे गरजेचे असल्याचे प्रशासनाने स्पष्ट केले आहे.