किरकोळ कारणातून महिलेसह कुटुंबियांना मारहाण: सहा जणांवर गुन्हे दाखल

शिकापूर: जातेगाव खुर्द (ता. शिरुर) येथे किरकोळ कारणातून महिलेसह तिच्या पती व मुलीला मारहाण करण्यात आल्याची घटना घडली असल्याने शिक्रापूर पोलीस स्टेशन येथे ज्ञानदेव नामदेव ढोबळे, शुभम ज्ञानदेव ढोबळे, शेशराव ज्ञानदेव ढोबळे, देवगन ज्ञानदेव ढोबळे, कान्हू ज्ञानदेव ढोबळे, आशाबाई ज्ञानदेव ढोबळे यांच्या विरुद्ध गुन्हे दाखल करण्यात आले आहे.

जातेगाव खुर्द (ता. शिरुर) येथील केंदूर रोड येथे राहणाऱ्या नंदा वावरे यांच्या भाच्याला शेवगाव येथील हॉस्पिटलमध्ये उपचारासाठी दाखल करण्यात आलेले असल्याने वावरे हे त्यांच्या घरातील पुरुषांना चला आपण भाच्याला भेटायला जाऊ, असे म्हणत असताना शेजारी राहणारा ज्ञानदेव ढोबळे हा व्यक्ती त्यांच्या भाच्याबाबत बरे-वाईट बोलू लागला. त्यामुळे नंदा वावरे यांनी असे बोलू नका म्हटल्याने ज्ञानदेव ढोबळे व त्याच्या कुटुंबीयांनी नंदा वावरे यांसह त्यांच्या पती व सुनेला शिवीगाळ, दमदाटी करत हाताने, लाथाबुक्क्यांनी तसेच काठीने बेदम मारहाण केली.

याबाबत नंदा भाऊसाहेब वावरे (वय ५०) रा. केंदूर रोड जातेगाव खुर्द (ता. शिरुर) जि. पुणे मूळ रा. गोळेगाव ता. शेवगाव जि. अहमदनगर यांनी शिक्रापूर पोलीस स्टेशन येथे फिर्याद दिली असल्याने शिक्रापूर पोलिसांनी ज्ञानदेव नामदेव ढोबळे, शुभम ज्ञानदेव ढोबळे, शेशराव ज्ञानदेव ढोबळे, देवगन ज्ञानदेव ढोबळे, कान्हू ज्ञानदेव ढोबळे, आशाबाई ज्ञानदेव ढोबळे सर्व रा. केंदूर रोड जातेगाव खुर्द (ता. शिरुर) जि. पुणे मूळ रा. गोळेगाव ता. शेवगाव जि. अहमदनगर यांच्या विरुद्ध गुन्हे दाखल केले असून सदर गुन्ह्याचा पुढील तपास पोलीस निरीक्षक हेमंत शेडगे यांच्या मार्गदर्शनाखाली पोलीस हवालदार आजिनाथ शिंदे हे करत आहे.