शिरुर तालुक्यात शेतात आढळला मृत अवस्थेतील बिबट्या

शिरुर वनविभाग व प्राणीमित्रांनी पंचनामा करत घेतले ताब्यात

शिक्रापूर: करंदी (ता. शिरुर) येथील गणपती माळ येथे एका शेतकऱ्याच्या शेतात मृतावस्थेतील बिबट्या आढळून आला असून शिरुर वनविभाग व वन्य पशु पक्षी संरक्षण सामाजिक संस्थेच्या प्राणीमित्रांनी सदर मृत बिबट्याचा पंचनामा करत मृतदेह शवविच्छेदन साठी पाठवून दिला आहे.

करंदी (ता. शिरुर) येथील गणपती माळ येथे नलिनी वर्पे यांच्या शेतात काही मेंढपाळ मेंढ्या चारत असताना त्यांना एक शेताच्या बांधावर एक बिबट्या मृतावस्थेत दिसून आला. याबाबतची माहिती शिरुर वनपरिक्षेत्र अधिकारी मनोहर म्हसेकर यांना मिळताच वनपरीमंडळ अधिकारी प्रवीण क्षीरसागर, वनरक्षक बबन दहातोंडे, प्रमोद पाटील, अभिजित सातपुते, वन्य पशु पक्षी संरक्षण सामाजिक संस्थेचे सचिव शेरखान शेख, अमोल कुसाळकर यांनी सदर ठिकाणी धाव घेत पाहणी केली यावेळी पोलीस पाटील वंदना साबळे, डॉ. नितीन सोनवणे, सामाजिक कार्यकर्ते महेश साबळे, प्रसाद गुंजाळ, खंडू सोनवणे, काशिनाथ ढोकले, रोहिदास गुंजाळ, कैलास साकोरे, बाळू साकोरे, राहुल ढोकले यांसह आदी उपस्थित होते.

दरम्यान सदर ठिकाणी अंदाजे तीन वर्षे वयाची बिबट मादी मृतावस्थेत असल्याचे दिसून आले, यावेळी वन विभागाचे अधिकारी व प्राणीमित्रांनी पंचनामा करत मृत बिबट्या शवविच्छेदन साठी शिरुर येथील वनविभाग कार्यालय येथे पाठवून दिला, तर यावेळी बोलताना सदर बिबट्याच्या मृत्यूचे कारण अद्याप अस्पष्ट असून शवविच्छेदन नंतर बिबट्याच्या मृत्यूचे नेमके कारण समजू शकेल असे वनपरीमंडळ अधिकारी प्रवीण क्षीरसागर यांनी सांगितले.