दिवसा घरफोडीचा थरार! शेतात गेलेल्या कुटुंबाचा फायदा घेत १७ तोळे सोन्यावर डल्ला; शिरूर तालुक्यात खळबळ

शिरूर (अरुणकुमार मोटे): शिरूर तालुक्यातील संविदणे गावात भरदिवसा झालेल्या धाडसी घरफोडीने परिसरात भीतीचे वातावरण निर्माण झाले आहे. कुटुंबातील सर्व सदस्य शेतीच्या कामासाठी शेतात गेल्याची संधी साधून अज्ञात चोरट्यांनी घराचे कुलूप तोडून आत प्रवेश केला आणि कपाट फोडत तब्बल १७ तोळे सोन्याचे दागिने, अंदाजे ८ लाख ५० हजार रुपयांचा ऐवज लंपास केला.

पोलिसांनी दिलेल्या माहितीनुसार, सविता बाळासाहेब पडवळ (वय ५२, रा. संविदणे, ता. शिरूर) यांनी शिरूर पोलीस ठाण्यात फिर्याद दाखल केली आहे. २१ जुलै रोजी सकाळी कुटुंबातील सर्व सदस्य शेतीच्या कामासाठी शेतात गेले होते. दुपारी सुमारे दोनच्या सुमारास मुलगा अजय घराकडे मोटार बंद करण्यासाठी आला असता मुख्य दरवाज्याचे कुलूप तुटलेले दिसले. त्याने कुटुंबीयांना माहिती दिल्यानंतर सर्वजण घरी धावले.

घरात प्रवेश केल्यानंतर बेडरूममधील लाकडी व लोखंडी कपाटे फोडलेली आढळली. कपाटातील सर्व साहित्य अस्ताव्यस्त फेकण्यात आले होते. पाहणी केली असता कपाटात ठेवलेले साडेतीन तोळ्यांचे गंठण, विविध मंगळसूत्रे, सोन्याची चैन, पुरुष व महिलांच्या अंगठ्या, कानातील दागिने व कर्णफुले असा एकूण १७ तोळे वजनाचा सोन्याचा ऐवज चोरीस गेल्याचे स्पष्ट झाले.

घटनेची माहिती मिळताच शिरूर पोलीस ठाण्याचे अधिकारी घटनास्थळी दाखल झाले. पंचनामा करून अज्ञात चोरट्यांविरुद्ध घरफोडीचा गुन्हा दाखल करण्यात आला आहे. परिसरातील सीसीटीव्ही फुटेज, संशयितांच्या हालचाली आणि तांत्रिक पुराव्यांच्या आधारे तपास सुरू असून, या प्रकरणाचा पुढील तपास पोलीस उपनिरीक्षक राहुल भागवत करीत आहेत.

दरम्यान, शिरूर तालुक्यात ग्रामीण भागात घरफोडीच्या घटनांमध्ये वाढ होत असल्याने नागरिकांमध्ये असुरक्षिततेची भावना निर्माण झाली आहे. दिवसाढवळ्या झालेल्या या धाडसी चोरीनंतर ⁠दिवसा देखील पोलिसांनी गस्त वाढवावी, अशी मागणी ग्रामस्थांकडून होत आहे.