रांजणगाव येथे संकष्ट चतुर्थी निमित्त श्री महागणपतीच्या दर्शनाला भाविकांची गर्दी

रांजणगाव गणपती (किरण पिंगळे-शेलार) शिरुर तालुक्यातील रांजणगाव गणपती हे स्थान महाराष्ट्रातील अष्टविनायकामधील आठवे स्थान म्हणुन प्रसिद्ध असुन त्याचा लौकिक सर्व महाराष्ट्रात नवसाला पावणारा महागणपती म्हणुन आहे. आज (दि 3) रोजी संकष्टी चतुर्थी निमित्त पहाटे ५ वाजता श्रींचा अभिषेक करुन मंदिर भाविकांसाठी खुले करण्यात आले. तसेच आज संकष्टी चतुर्थी निमित्त श्री क्षेत्र रांजणगाव गणपती देवस्थान ट्रस्टच्या वतीने सामूहिक अथर्वशीर्ष पठण कार्यक्रम आयोजित करण्यात आला होता.

सध्या पावसाचे दिवस असूनही हजारो भाविकांनी अथर्वशीर्ष पठण केले. तसेच दर्शन रांगेतील भाविकांच्या हस्ते सकाळची व सायंकाळची आरती करण्यात येत आहे. तसेच श्रावण महिन्यातील ही संकष्ट चतुर्थी असल्याने मोठ्या प्रमाणावर भाविकांनी श्रींच्या दर्शनासाठी गर्दी केली होती अशी माहिती देवस्थान ट्रस्टच्या अध्यक्षा स्वाती पाचुंदकर पाटील यांनी दिली.

आज संकष्टी चतुर्थी निमित्त भाविकांसाठी उत्तम प्रकारे जलद दर्शन व्यवस्था, खिचडी प्रसाद, पिण्याचे पाणी, सध्या पावसाचे दिवस असल्याने मंदिर परिसरात भाविकांसाठी मंडप करण्यात आला होता. श्री क्षेत्र रांजणगाव गणपती देवस्थान ट्रस्ट व अष्टविनायक ब्लड बँक यांच्या संयुक्त विद्यमाने रक्तदान शिबिर आयोजित करण्यात आले होते. त्यालाही मोठ्या प्रमाणात भाविकांनी प्रतिसाद दिला.

तसेच संकष्टी चतुर्थी निमित्त दुपारी १२ वाजता देवस्थान ट्रस्टचे मुख्य विश्वस्त डॉ ओमकार देव यांच्या हस्ते महापूजा व महानैवेद्य करण्यात आला. तसेच प्रगतशील शेतकरी नानासाहेब दिनकरराव पाचुंदकर पाटील यांच्या वतीने मंदिर गाभाऱ्यात फुलांची आकर्षक सजावट करण्यात आली. तसेच श्री महागणपती भजनी मंडळ, रांजणगाव गणपती यांचा भजनाचा कार्यक्रम झाला.

यावेळी देवस्थानचे विश्वस्त मंडळ मुख्यविश्वस्त डॉ ओमकार देव, अध्यक्षा स्वाती पाचुंदकर पाटील, उपाध्यक्ष संदिप दौंडकर, सचिव डॉ तुषार पाचुंदकर पाटील, तसेच पुजारी प्रसाद कुलकर्णी, मकरंद कुलकर्णी, राजमुद्रा पतसंस्थेचे अध्यक्ष दत्तात्रय पाचुंदकर पाटील व देवस्थान कर्मचारी, तसेच इतर मान्यवर उपस्थित होते. रांजणगाव एमआयडीसी पोलिस स्टेशनचे पोलिस निरीक्षक महेश ढवाण यांच्या मार्गदर्शनाखाली मंदिर परिसरात चोख बंदोबस्त ठेवण्यात आला होता.