शेतकऱ्यांनी ई पिक पाहणी ॲपचा वापर करणे गरजेचे; सुशीला गायकवाड

शिक्रापूरच्या शालेय विद्यार्थ्यांनी घेतली ई पिक पाहणी ॲपची माहिती

शिक्रापूर (शेरखान शेख): शेतकऱ्यांना शेतातील पिकांना येणारे अनुदान तसेच नैसर्गिक आपत्तीनंतर मिळणारी शासकीय मदत मिळवण्यासाठी शेतकऱ्यांनी ई पिक पाहणी ॲपचा वापर करणे गरजेचे असल्याचे तलाठी सुशीला गायकवाड यांनी सांगितले.

शिक्रापूर (ता. शिरुर) येथील काळभैरवनाथ माध्यमिक विद्यालय कोयाळी पुनर्वसन येथे शालेय मुलांना नुकतीच तलाठी सुशीला गायकवाड यांच्या वतीने ई पिक पाहणी ॲपची माहिती देण्यात आली. यावेळी प्राचार्य गणेश खेडकर, ग्रामपंचायत सदस्य त्रिनयन कळमकर, दत्तात्रय लांडगे, मीना साळवे यांसह आदी उपस्थित होते.

दरम्यान शालेय मुलांना सदर ॲपबाबत माहिती देताना शेतकऱ्यांनी त्यांच्या शेतात उभे राहून शेतातील ऊस, ज्वारी, बाजरी, मुग, कांदा, बटाटा यांसह सर्व पिकांची माहिती या ई पिक पाहणी ॲपवर भरल्यास काही आपत्ती निर्माण झाल्यास शेतकऱ्यांना नुकसान भरपाई लवकर मिळू शकते. त्यासाठी शेतकऱ्यांच्या शेतातील पिकांची माहिती ई पिक पाहणी ॲपवर असणे गरजेचे असल्याचे तलाठी सुशीला गायकवाड यांनी सांगितले. यावेळी प्राचार्य गणेश खेडकर यांनी सर्वांचे आभार मानले.