शिरुर तालुक्यातील ह.भ.प.गणेश महाराज फरताळे यांनी दशक्रियाचे मानधन नाकारले

शिक्रापूर (शेरखान शेख): कोरोना काळामध्ये अनेक कुटुंबातील कर्ते पुरुष मृत झाले तर काही मातेंचा मुलगा मृत झालेला असताना नुकतेच शिरुर तालुक्यातील एका मातेच्या दशक्रिया दरम्यान सदर मातेचा तरुण मुलगा कोरोनामध्ये मृत झाल्याचे समजताच ह. भ. प. गणेश महाराज फरताळे यांनी दशक्रिया विधीतील प्रवचनचे मानधन नाकारून समाजापुढे आदर्श निर्माण करुन दिला आहे.

निमगाव म्हाळुंगी (ता. शिरुर) येथील शेतकरी कुटुंबातील कै. लताबाई अरुण चव्हाण यांचे नुकतेच निधन झाले. त्यांच्या दशक्रिया विधीसाठी शिरुर तालुक्यातील प्रसिद्ध प्रवचनकार ह. भ. प. गणेश महाराज फरताळे यांचे प्रवचन पार पडले.

परंतु कोरोना काळामध्ये लताबाई यांचा तरुण मुलगा गणेश चव्हाण हा मृत पावला आहे हे गणेश महाराज फरताळे यांना समजताच त्यांनी कै. लताबाई यांना मुलगा नाही परंतु मीच त्यांचा मुलगा होऊन त्यांना प्रवचन रुपी सेवेतून श्रद्धांजली वाहतो सदर दशक्रिया मध्ये मी कोणत्याही प्रकारचे मानधन स्वीकारणार नाही, मानधनाचे पैसे गणेश चव्हाण यांच्या मुलींच्या शैक्षणिक कार्यात खर्च करावे हि अपेक्षा व्यक्त करत त्यांचे कार्य प्रत्यक्ष कृतीतून दाखवून दिले आहे, तर गणेश महाराज फरताळे यांनी प्रवचनचे मानधन नाकारून समजात आदर्श निर्माण केला आहे.

दरम्यान त्यांच्या या कृत्याचे दशक्रिया साठी जमलेल्या नागरिकांनी कौतुक देखील केले तर चव्हाण कुटुंबाचा घटक या नात्याने ग्रामपंचायत सदस्य विक्रम चव्हाण यांनी गणेश महाराज फरताळे यांच्या सहकार्या बद्दल ऋण व्यक्त केले.