शिक्रापुरातून युवकाचा लॅपटॉप व मोबाईल लांबविला

शिक्रापूर (शेरखान शेख): शिक्रापूर (ता. शिरुर) येथील एका मुलाच्या घरातून अज्ञात व्यक्तीने चोरून नेल्याची घटना घडली असल्याने शिक्रापूर पोलीस स्टेशन येथे अज्ञात चोरट्यावर गुन्हे दाखल करण्यात आले आहे.

शिक्रापूर (ता. शिरुर) येथील मलठण फाटा नजीक शिक्षक कॉलनी मध्ये सिद्धेश शामकुवर हा मित्रांसमवेत राहत आहे. सकाळच्या सुमारास सिध्देशचा एक मित्र रुम मध्ये झोपलेला असताना सिद्धेश त्याचा मोबाईल घरात ठेवून कामाला गेला होता. काही वेळाने सिद्धेशचा मित्र विशाल कामावरुन घरी आला त्यावेळी दरवाजा उघडा दिसला त्यांनतर विशालने त्याचा लॅपटॉप पाहिला असता त्याला लॅपटॉप दिसला नाही. त्यामुळे त्याने इतर मित्रांना सांगून घरात पाहणी केली असता घरात ठेवलेला विशालचा लॅपटॉप व सिद्धेशचा मोबाईल अज्ञात चोरट्याने चोरुन नेल्याचे निदर्शनास आले.

याबाबत सिद्धेश राजरतन शामकुवर रा. शिक्षक कॉलनी मलठण फाटा शिक्रापूर (ता. शिरुर) जि. पुणे मूळ रा. सातगाव गुरुकुल कॉलनी रींधोरा ता. हिंगणा जि. नागपूर याने शिक्रापूर पोलीस स्टेशन येथे फिर्याद दिली असल्याने शिक्रापूर पोलिसांनी अज्ञात व्यक्तीवर गुन्हे दाखल केले असून पुढील तपास पोलीस निरीक्षक हेमंत शेडगे यांच्या मार्गदर्शनाखाली पोलीस हवालदार मंगेश लांडगे हे करत आहे.