पाबळला कंटेनर मधून पत्र्याचे रोल पडून मोठा अपघात

सुदैवाने जीवित हानी नाही मात्र दूध डेअरी सह वाहनांचे नुकसान

शिक्रापूर: पाबळ (ता. शिरुर) येथे बेल्हा जेजुरी या मुख्य रस्त्यावर एका कंटेनर मधून वाहतूक करण्यात येत असलेले तब्बल २२ टन वजनाचे २ पत्र्याचे रोल रस्त्यावर पडून अपघात होऊन येथील दूध डेअरी सह काही वाहनांचे मोठे नुकसान झाल्याची घटना घडली आहे.

पाबळ (ता. शिरुर) येथे बेल्हा जेजुरी या मुख्य रस्त्यावर पहाटेच्या सुमारास अवजड असे पत्र्याचे रोल घेऊन एम एच ४६ ए आर ४२९४ हा कंटेनर शिरुर बाजूने खेड सेझ येथे जात होता. सदर कंटेनर हा पाबळ येथे मुख्य चौकामध्ये आला असता त्याचा ताबा सुटून कंटेनर जागेवर पलटी झाला. यावेळी कंटेनर मधील १ पत्र्याचा रोल रस्त्यालगत असलेल्या दूध डेअरीला धडकला तर १ रोल शेजारीच असलेल्या हॉस्पिटलला धडकला.

यावेळी दूध डेअरीचे सह डॉक्टरांच्या खाजगी वाहनाचे तसेच काही रुग्णांच्या दुचाकी व चारचाकी वाहनांचे मोठ्या प्रमाणावर नुकसान झाले. सुदैवाने सदर घटना पहाटेच्या सुमारास घडल्याने कोणतीही जीवितहानी झाली नाही. दिवसभर या रस्त्यावर मोठ्या प्रमानावर नागरिक व वाहनांची वर्दळ असते मात्र पहाटेच्या घटनेमुळे मोठा अनर्थ टळला गेला असून घटनेची माहिती मिळताच शिक्रापूर पोलिसांनी सदर घटनास्थळी धाव घेत पंचांनाम केला आहे.