शिरूर नगरपरिषदेचा स्वच्छता आणि पर्यावरण संवर्धनासाठी उल्लेखनीय उपक्रम

शिरूर (अरुणकुमार मोटे): स्वच्छ सर्वेक्षण २०२५ आणि माझी वसुंधरा अभियान ६.० अंतर्गत शिरूर नगरपरिषदेच्या वतीने विविध उपक्रम राबविण्यात येत आहेत. नगरपरिषदेचे मुख्याधिकारी तथा प्रशासक प्रितम पाटील यांच्या मार्गदर्शनाखाली, शिरूर नगरपरिषद हद्दीतील शासकीय मुलींच्या वसतीगृह परिसरात वृक्षारोपणाचा सुंदर उपक्रम राबविण्यात आला. यावेळी बांबू, चिंच, कौठ, चिक्कू, जांभूळ यांसारख्या उपयोगी व पर्यावरणपूरक २३७ झाडांचे वृक्षारोपण करण्यात आले.

या कार्यक्रमानंतर नगरपरिषदेच्या वतीने स्वच्छ सर्वेक्षण २०२४ व माझी वसुंधरा अभियान ५.० अंतर्गत घेण्यात आलेल्या ‘वेस्ट टू वंडर’ स्पर्धेच्या बक्षीस वितरण समारंभाचे आयोजन करण्यात आले. या स्पर्धेअंतर्गत शाळांमध्ये फेकून दिलेल्या साहित्याचा – जसे टायर, प्लास्टिक बाटल्या, दोरी, पुठ्ठा, लाकूड इत्यादी – वापर करून आकर्षक कलाकृती व देखावे साकारण्याची कल्पक संधी विद्यार्थ्यांना देण्यात आली होती.या स्पर्धेमध्ये शहरातील ०७ शाळांनी सहभाग घेतला होता. स्पर्धेतील पहिल्या तीन विजेत्या शाळांना ट्रॉफी व प्रमाणपत्र, तर उर्वरित सहभागी शाळांना प्रमाणपत्र देऊन गौरविण्यात आले.

कार्यक्रमाच्या यशस्वी आयोजनासाठी नगरपरिषदेचे संपूर्ण यंत्रणा सक्रिय होती. कार्यक्रमास शासकीय मुलींचे वसतीगृहाचे अधीक्षक श्रीमती वैशाली सटाले, नगरपरिषदेचे मुख्याधिकारी प्रितम पाटील, आर. एम. डी. इंग्लिश मिडियम स्कूल च्या मुख्याध्यापिका श्रीमती अश्विनी घारु, विद्याधाम प्राथमिक शाळेच्या मुख्याध्यापिका श्रीमती ज्योती मुळे, तसेच शिरूर नगरपालिका शाळा क्र. १, ३ व ६, जीवन विकास मंदिर, व्हिजन इंटरनॅशनल स्कूल या शाळांचे शिक्षक, विद्यार्थ्यांनी सहभाग घेतला.

तसेच नगरपरिषदेचे विविध विभागांचे अधिकारी व कर्मचारी देखील मोठ्या संख्येने उपस्थित होते. यामध्ये स्वच्छता व पाणीपुरवठा अभियंता आदित्य बनकर, कर निरीक्षक माधव गाजरे, नगररचना सहाय्यक पंकज काकड, सहा. कार्यालयीन अधीक्षक ज्ञानेश्वर चाकणे व श्रीम. शितल काळे, लेखापाल अंकुश इचके, अंतर्गत लेखापरीक्षक दत्तात्रय टोपे, संगणक अभियंता रत्नदीप पालके, विद्युत अभियंता तेजस शिंदे, स्थापत्य अभियंता शामली लाड, भूषण कडेकर, चंद्रकांत पठारे, अनिल चव्हाण, मिठ्ठू गावडे, शहर समन्वयक प्राची वाखारे, प्र. स्वच्छता मुकादम मनोज आहिरे, किरण जाधव, गणेश शेंडगे, मनोज शेळके, रामशरण आडोळे, महेश लोळगे, स्वप्नील तरटे, सागर बडगुजर, गौरव कुलथे,नीता जाधव यांचा सहभाग विशेष उल्लेखनीय होता.

याशिवाय नगरपरिषदेचे सर्व सफाई कर्मचारी उपस्थित राहून कार्यक्रमाला आपले योगदान दिले. या कार्यक्रमातून शिरूर नगरपरिषदेच्या पर्यावरण रक्षण आणि स्वच्छतेविषयीच्या बांधिलकीचा प्रत्यय आला. वृक्षारोपण आणि वेस्ट टू वंडर यांसारख्या उपक्रमांद्वारे शिरूर शहरात स्वच्छ, सुंदर आणि शाश्वत भविष्यासाठी नागरिकांमध्ये जनजागृती होत आहे.