शिरूर तालुक्यात शेतजमिनीवरील उसाची चोरी; तीन जणांविरुद्ध गुन्हा दाखल

शिरूर (अरुणकुमार मोटे): शिरूर तालुक्यातील निमोणे येथे एक धक्कादायक प्रकार समोर आला आहे, जिथे एक शेतकरी आपल्या खरेदी केलेल्या शेतजमिनीत गेलेल्या असता, त्याने स्वतः लावलेला ऊस कोणीतरी चोरी करून नेल्याचे उघड झाले आहे. या प्रकरणी विश्रांतवाडी, पुणे येथील रहिवासी ज्योती शिवाजी जाधव (वय ४२) यांनी शिरूर पोलीस स्टेशनमध्ये गुन्हा नोंदवला आहे.

फिर्यादीने दिलेल्या माहितीप्रमाणे, त्यांनी गट नंबर 1064/1/अ मधील एक एकर क्षेत्र विकत घेतले होते. दिनांक 19 मे 2025 रोजी दुपारी 2 वाजेच्या सुमारास त्यांनी त्या शेतजमिनीत भेट दिली असता, तेथे लावलेला २० महिन्यांचा उभा ऊस कुणीतरी तोडून चोरी करून नेल्याचे लक्षात आले. त्याचप्रमाणे त्या शेतात नांगरटही करण्यात आलेली होती.

फिर्यादीच्या आरोपानुसार, ही संपूर्ण घटना शेजारील शेतकरी महादेव भगवान लाड, तसेच मूळ जमीनमालक आरूणा नाना काळे व नाना सोनबा काळे (सर्व रा. निमोणे, ता. शिरूर) यांच्या संगनमताने घडवली गेली आहे. या तिघांनी मिळून बेकायदेशीरपणे शेतात प्रवेश करून ऊस चोरी केल्याचा आरोप करण्यात आला आहे.

या प्रकरणी शिरूर पोलीस स्टेशन मध्ये गुन्हा दाखल करण्यात आला असून, या प्रकरणाचा तपास पो.हवा टेंगले हे करत आहेत. शेतजमिनीतील वादातून वाढलेल्या या प्रकारामुळे निमोणे परिसरात एकच खळबळ उडाली आहे. स्थानिक पोलीस यावर पुढील तपास करत असून, दोषींवर कडक कारवाई होणार असल्याचे संकेत दिले आहेत.