शिक्रापूरच्या आठवडे बाजारात युवकाला मारहाण

शिक्रापूर (शेरखान शेख): शिक्रापूर (ता. शिरुर) येथे आठवडे बाजारात बटाट्याच्या गोणीवर पाणी सांडल्याने युवकाला बेदम मारहाण करण्यात आल्याची घटना घडली असल्याने शिक्रापूर पोलीस स्टेशन येथे नाथा बबन उमाप, प्रदीप दगडू उमाप, मंगेश फुलमोगरे, सुमित संपत नरके या चौघांवर गुन्हे दाखल करण्यात आले आहे.

शिक्रापूर (ता. शिरुर) येथील आठवडे बाजारात एक महिला बटाटे विक्रीसाठी बसलेली असताना सागर भुजबळ हा युवक बाजारामध्ये पिण्याच्या पाण्याचे जार देण्यासाठी आला असताना जार मधील पाणी सदर महिलेच्या बटाट्याच्या गोणीवर पडल्याने महिलेचा मुलगा मंगेश फुलमोगरे याने सागर यास शिवीगाळ, दमदाटी केली दरम्यान त्यांच्यात वाद झाला.

यावेळी मंगेश याने फोन करुन काही युवकांना बोलावून घेतले असता नाथा उमाप, प्रदीप उमाप, सुमित नरके सदर ठिकाणी आले त्यांनी सागर यास शिवीगाळ, दमदाटी करत मारहाण करत जखमी केले. यावेळी सागरची बहिण भांडणे सोडवण्यास आली असता मारहाण करणाऱ्या लोकांनी तिला सुद्धा शिवीगाळ, दमदाटी करत मारहाण केली.

याबाबत सागर रवींद्र भुजबळ (वय ३१) रा. पांढरी तळेगाव ढमढेरे (ता. शिरुर) जि. पुणे यांनी शिक्रापूर पोलीस स्टेशन येथे फिर्याद दिली असल्याने शिक्रापूर पोलिसांनी नाथा बबन उमाप, प्रदीप दगडू उमाप, मंगेश फुलमोगरे तिघे रा. जातेगाव बुद्रुक (ता. शिरुर) जि. पुणे, सुमित संपत नरके रा. तळेगाव ढमढेरे (ता. शिरुर) जि. पुणे यांच्या विरुद्ध गुन्हे दाखल केले असून पुढील तपास पोलीस निरीक्षक प्रमोद क्षिरसागर यांच्या मार्गदर्शनाखाली पोलीस हवालदार बापू हडागळे हे करत आहे.