जातेगाव खुर्द मधून चक्क कंटेनरची नवीन चाशी चोरी

शिक्रापूर (शेरखान शेख): जातेगाव खुर्द (ता. शिरुर) येथील शिक्रापूर चाकण रस्त्याचे नजीक असलेल्या पंजाबी ढाब्यासमोरुन एका नवीन कंटेनरची चाशी चोरीला गेल्याची घटना घडली असल्याने शिक्रापूर पोलीस स्टेशन येथे अज्ञात चोरट्यावर गुन्हे दाखल करण्यात आले आहे.

शिक्रापूर चाकण रस्त्याने सरबजित सिंग यांच्या ट्रान्सपोर्टचा चालक साहिल लाहुरी हा त्याच्या ताब्यातील टाटा कंपनीच्या कंटेनरची जे एच ०५ ए ७८५६ हा तात्पुरता नंबर असलेली नवीन बारा टायर असलेली चाशी घेऊन पनवेल येथे देण्यासाठी चालेलला असताना रात्री साडेअकरा वाजण्याच्या सुमारास जातेगाव खुर्द येथील खालसा पंजाबी ढाबा येथे चहा पिण्यासाठी थांबला होता. काही वेळाने चहा पिऊन पुन्हा चालक सदर कंटेनर जवळ आला असता त्याचा कंटेनर गायब झाल्याचे दिसून आले.

याबाबत सरबजित बलदेव सिंग (वय ४६) रा. टाटा नगर गोलमुरी ता. गोलमुरी जि. सिंबूम झारखंड यांनी शिक्रापूर पोलीस स्टेशन येथे फिर्याद दिली असल्याने शिक्रापूर पोलिसांनी अज्ञात व्यक्तीवर गुन्हे दाखल केले असून पुढील तपास पोलीस निरीक्षक हेमंत शेडगे यांच्या मार्गदर्शनाखाली पोलीस नाईक भरत कोळी हे करत आहे.