शिक्रापूरातून व्यावसायिकाची हातगाडी व साहित्य चोरी

शिक्रापूर (शेरखान शेख): शिक्रापूर (ता. शिरुर) येथील बजरंगवाडी येथे भेळपुरीची हातगाडी चालवून व्यवसाय करणाऱ्या युवकाची हातगाडी व साहित्य अज्ञात व्यक्तीने चोरुन नेल्याची घटना घडली असल्याने शिक्रापूर पोलीस स्टेशन येथे अज्ञात व्यक्तीवर गुन्हे दाखल करण्यात आले आहे.

शिक्रापूर (ता. शिरुर) येथील बजरंगवाडी येथे अम्बा लाल या युवकाचा भेळपुरीचा छोटासा व्यवसाय असून हातगाडीवर सदर युवक व्यवसाय करतो. 25 ऑगस्ट रोजी रात्रीच्या वेळी अम्बा लाल हा गाडी बंद करुन घरी गेला होता. सकाळच्या सुमारास पुन्हा सदर ठिकाणी आला असता त्याला त्याची हातगाडी दिसून आली नाही त्यामुळे त्याने सर्वत्र शोध घेतला असता हातगाडी चोरीला गेल्याचे त्याच्या निदर्शनास आले.

याबाबत अम्बा उदाजी लाल (वय ३५) रा. बजरंगवाडी शिक्रापूर (ता. शिरुर) जि. पुणे मूळ रा. पालोट ता. डुंगला जि. चित्तोडगड राजस्थान याने शिक्रापूर पोलीस स्टेशन येथे फिर्याद दिली असल्याने शिक्रापूर पोलिसांनी अज्ञात चोरट्यावर गुन्हे दाखल केले असून सदर गुन्ह्याचा पुढील तपास पोलीस निरीक्षक हेमंत शेडगे यांच्या मार्गदर्शनाखाली पोलिस हवालदार बापू हडागळे हे करत आहे.