शिरुर तालुक्यात पुणे-नगर महामार्गावर अपघातात तरुणाचा मृत्यू…

रांजणगाव गणपती (तेजस फडके): पुणे-नगर महामार्गावरीरल कारेगाव येथील कारेश्वर मंदिरासमोर बुधवारी (ता. २८) रात्री 11:15 वाजण्याच्या सुमारास एका ट्रकच्या धडकेत शुभम गोरख राक्षे (वय 23) हा तरुण मृत्यूमुखी पडला आहे. याबाबत ट्रकचालक आकाश तातेराव मुसळे (वय 23, रा. मेडशी, ता. मालेगाव, जि. वाशिम) याच्या विरोधात गुन्हा दाखल करण्यात आला आहे.

मृत युवकाचे वडील गोरख महादेव राक्षे (रा. रांजणगाव सांडस, राक्षेवाडी, ता. शिरुर, जि पुणे) यांनी रांजणगाव MIDC पोलिस स्टेशन येथे फिर्याद दाखल केली आहे. रांजणगाव पोलिसांनी दिलेल्या माहितीनुसार, 28 जून 2023 रोजी रात्री 11:15 च्या सुमारास कारेगाव येथील कारेश्वर मंदिराच्या समोर पुणे-नगर महामार्गावर असणाऱ्या रस्ता दुभाजकालगत ट्रक क्रं MH 38 X 4441 ने शुभम गोरख राक्षे (वय 23) याच्या दुचाकीस धडक दिल्याने त्याच्या डोक्याला तसेच छातीस गंभीर दुखापत झाल्याने त्याचा मृत्यू झाला आहे.

शुभमचे वडिल गोरख राक्षे यांनी ट्रकचालकाविरोधात रांजणगाव पोलिस स्टेशन येथे फिर्याद दिल्याने गुन्हा दाखल झाला आहे. या घटनेचा पुढील तपास सहायक फौजदार मारुती पासलकर हे करत आहेत.