Video: शिरुर तालुक्यातील बलात्कार प्रकरण फास्टट्रक कोर्टात चालवा: तृप्ती देसाई

शिक्रापूर (शेरखान शेख): शिक्रापूर पोलीस स्टेशन हद्दीमध्ये भाजपच्या नेत्याच्या फार्म हाउसवर एका 12 वर्षाच्या मुलीवर बलात्कार केल्याची घटना घडली असून सदर बलात्कार प्रकरण फास्टट्रॅक कोर्टात चालवण्याची मागणी करत भाजप नेत्याची चर्चा नको म्हणून प्रकरण दाबले जाणार असेल तर रस्त्यावर उतरण्याचा इशारा देखील भूमाता ब्रिगेडच्या अध्यक्षा तृप्ती देसाई यांनी दिला आहे.

शिक्रापूर (ता. शिरुर) पोलीस स्टेशन हद्दीमध्ये एका भाजप नेत्याच्या फार्म हाउसवर 12 वर्षाच्या मुलीवर बलात्कार केल्याची घटना घडली. घटनेबाबत गुन्हा दाखल होताच पोलिसांनी आरोपीला अटक केली. मात्र यानंतर सदर घटनेशी भाजप नेत्याचा कोणताही संबंध नसला तरी ते फार्म हाउस भाजप नेत्याच्या मालकीचे असल्यामुळे या नेत्याच्या तसेच त्याच्या फार्म हाउसची चर्चा कोठे नको, यासाठी सदर प्रकरण दाबले जाण्याची शक्यता तृप्ती देसाई यांनी वर्तवली आहे.

सदर बलात्कार प्रकरण तातडीने फास्टट्रॅक कोर्टात चालवत पिडीत मुलीला न्याय देण्याची मागणी गृहमंत्री देवेंद्र फडणवीस यांच्याकडे करत भाजप नेत्याची चर्चा नको म्हणून प्रकरण दाबले जाणार असेल तर आम्ही रस्त्यावर उतरु असा इशारा देखील भूमाता ब्रिगेडच्या अध्यक्षा तृप्ती देसाई यांनी दिला आहे.

सदर प्रकारात भाजप नेत्याचा कोणताही संबंध नाही, तसेच बलात्कार प्रकरणातील आरोपीला तातडीने अटक करत न्यायालयात हजर केले असता त्याचा 4 दिवस पोलीस कोठडी सुनावण्यात आलेली असून घटनेतील तपास यंत्रणेवर कोणताही दबाव नसल्याचा निर्वाळा शिक्रापूर पोलीस स्टेशनचे पोलीस निरीक्षक हेमंत शेडगे यांनी केला आहे.