‘सायकलचा आधार भविष्याला आकार’  उपक्रमातून ग्रामीण भागातील शैक्षणिक प्रवास होणार सुलभ

शिरूर तालुक्यात तब्बल ३३१ सायकलीचे वाटप 

शिरूर (अरुणकुमार मोटे): ग्रामीण भागातील विद्यार्थिनींच्या शैक्षणिक प्रवासाला चालना देण्यासाठी पुणे जिल्हा परिषदेच्या वतीने “सायकलचा आधार, भविष्याला आकार” हा उपक्रम राबविण्यात आला आहे. या उपक्रमाला शिरूर तालुक्यात अभूतपूर्व प्रतिसाद मिळाला असून एकूण ३३१ सायकली गरजू मुलींना भेट म्हणून देण्यात आल्या.

शिरूर तालुक्यातील अनेक विद्यार्थिनींना शाळेत जाण्यासाठी दररोज लांबचा प्रवास करावा लागतो. सार्वजनिक वाहतूक साधने अपुरी असल्याने त्यांना मोठ्या अडचणींना सामोरे जावे लागत होते. ही समस्या दूर करण्यासाठी जिल्हा परिषदेने गावागावांतील दानशूर व्यक्तींना सायकल दान करण्याचे आवाहन केले होते.

या आवाहनाला सरपंच, उपसरपंच, ग्रामपंचायत सदस्य, ग्रामपंचायत अधिकारी, सर्व शिक्षक संघटना, शिक्षक, अधिकारी व कर्मचारी तसेच समाजातील दानशूर व्यक्तींनी उत्स्फूर्त प्रतिसाद दिला. या सामूहिक सहभागातून तब्बल ३३१ सायकली जमा होऊन विद्यार्थिनींना वाटप करण्यात आल्या.

शिरूर तालुक्यातील गोलेगाव – १०,करंजावणे – ३, पिंपळे खालसा – १०, सोनेसांगवी – २, शिरूर ग्रामीण – २

न्हावरा – १,बाभुळकर बु. – ६,कर्डे – ३

वरुडे – १,जातेगाव बु. – २,आन्नापूर – १८

शिरसगाव काटा – ४,निमोणे – २४,काठापूर खुर्द – ५,धानोरे – १,रांजणगाव सांडस – ७,रांजणगाव गणपती – २,दहिवडी – १,तर्डोबाची वाडी – ६

सरदवाडी – २,खैरेवाडी – ६,केंदूर – ३,पारोडी – १५,सविंदणे – ४,कोंढापुरी – ४,तळेगाव – १८

मलठण – १६,कवठे येमाई – २,पाबळ – १

निमगाव म्हाळुंगी – २ अशा प्रकारे गावनिहाय सायकली वाटप करण्यात आल्या.

या उपक्रमाबाबत गटविकास अधिकारी महेश डोके यांनी सांगितले की, “अनेक विद्यार्थिनी लांबवरून पायी शाळेत जातात. सायकल मिळाल्याने त्यांचा शैक्षणिक प्रवास सुलभ होईल. एका सायकलीमुळे एका मुलीचे जीवनमान बदलू शकते. जिल्हा परिषद व समाजातील सर्व घटकांनी एकत्र येऊन हा उपक्रम यशस्वी केला आहे. या उपक्रमामुळे मुलींच्या चेहऱ्यावर आनंद झळकला. शाळेत ये-जा करण्यासाठी मिळालेल्या या सायकलींमुळे केवळ वेळ वाचणार नाही, तर शैक्षणिक प्रगतीलाही चालना मिळणार आहे. दानशूर व्यक्तींनी केलेल्या योगदानामुळे समाजातील संवेदनशीलता आणि शैक्षणिक बांधिलकी अधोरेखित झाली आहे.