अजितदादांचा विमान अपघात घातपातच? रोहित पवारांचा ठाम आरोप; शरद पवारांच्या भूमिकेवरही प्रश्नचिन्ह

मुंबई: उपमुख्यमंत्री दिवंगत अजित पवार यांच्या विमान अपघातावरून राज्यातील राजकारण पुन्हा तापले आहे. हा अपघात घातपाताचा असल्याचा संशय व्यक्त करत तज्ज्ञ समितीमार्फत स्वतंत्र आणि सखोल चौकशी करण्याची मागणी राष्ट्रवादी काँग्रेसच्या शरद पवार गटाचे आमदार Rohit Pawar यांनी ठामपणे केली आहे.

मुंबईत तिसरी पत्रकार परिषद; प्रेझेंटेशनद्वारे मांडले मुद्दे

रोहित पवार यांनी मुंबईत तिसरी पत्रकार परिषद घेत अपघातासंदर्भात सविस्तर प्रेझेंटेशन सादर केले. घटनाक्रमातील विसंगती, तांत्रिक बाबी आणि अधिकृत चौकशीतील मुद्द्यांवर त्यांनी गंभीर प्रश्न उपस्थित केले.“ही केवळ राजकीय भूमिका नाही. जनतेच्या मनात जे प्रश्न आहेत, तेच मी मांडत आहे. घातपाताचा कोन तपासल्याशिवाय सत्य बाहेर येणार नाही,” असे त्यांनी स्पष्ट केले.

शरद पवार का शांत? अमोल कोल्हेंचे उत्तर

या पार्श्वभूमीवर ज्येष्ठ नेते शरद पवार यांची भूमिका काय, असा प्रश्न उपस्थित होत आहे. यावर खासदार अमोल कोल्हे यांनी स्पष्टीकरण दिले.“अजित पवार यांच्या निधनाची बातमी समोर आल्यानंतर भावनिक वातावरण होते. त्या वेळी शरद पवार यांनी संयम बाळगला. जर त्यांनी पहिल्याच दिवशी संशय व्यक्त केला असता, तर परिस्थिती वेगळी झाली असती,” असे कोल्हे म्हणाले.ते पुढे म्हणाले, “रोहित पवारांनी उपस्थित केलेले प्रश्न अनेकांच्या मनात आहेत. त्या सर्व प्रश्नांची उत्तरे मिळणे आवश्यक आहे.”

सुप्रिया सुळे यांचीही संयमाची भूमिका

दरम्यान, संविधानिक पदावर लीडर ऑफ हाऊस असलेल्या Supriya Sule यांनीही चौकशी अहवाल आल्यानंतरच ठोस भूमिका मांडू, असे स्पष्ट केले आहे.

राज्याचे लक्ष सरकारकडे

रोहित पवार यांच्या सातत्यपूर्ण मागणीमुळे या प्रकरणाला नवे राजकीय वळण मिळाले आहे. स्वतंत्र तज्ज्ञ समिती नेमली जाणार का, सरकारची भूमिका काय असेल, याकडे राज्याचे लक्ष लागले आहे.

दरम्यान, या प्रकरणावरून राष्ट्रवादी काँग्रेसमध्येही वेगवेगळ्या स्तरावर चर्चा सुरू असून, अपघाताच्या चौकशीबाबतची पारदर्शकता हा आता मुख्य मुद्दा ठरत आहे.