धर्म स्वातंत्र्य विधेयकावर विधानसभेत जोरदार चर्चा; जितेंद्र आव्हाडांचा विरोध, शिवसेनेचा पाठिंबा

मुंबई: राज्य सरकारने विधिमंडळात सादर केलेल्या धर्म स्वातंत्र्य (Freedom of Religion) विधेयकावर विधानसभेत सोमवारी जोरदार चर्चा झाली. मुख्यमंत्री देवेंद्र फडणवीस यांनी विधेयकाचा हेतू सभागृहात स्पष्ट केल्यानंतर विरोधकांनी आपापल्या भूमिका मांडल्या. या विधेयकाला उद्धव ठाकरे यांच्या शिवसेनेने पाठिंबा दिला, तर शरद पवार यांच्या राष्ट्रवादी काँग्रेस (शरदचंद्र पवार गट)ने विरोध दर्शवला.

चर्चेदरम्यान राष्ट्रवादी काँग्रेसचे आमदार जितेंद्र आव्हाड यांनी विधेयकाच्या हेतूवर प्रश्न उपस्थित करत तीव्र विरोध नोंदवला. “जबरदस्तीने धर्मांतराला आमचा विरोध आहे; मात्र ‘धर्म स्वातंत्र्य’ या नावाने विधेयक आणणे म्हणजे संविधानाच्या तत्त्वांना छेद देणे आहे,” असे ते म्हणाले. धर्मांतराच्या इतिहासाचा उल्लेख करत त्यांनी गौतम बुद्ध , जैन आणि बसवेश्वर यांचाही संदर्भ दिला.

आव्हाड यांनी आपल्या भाषणात सामाजिक भेदभाव आणि जातिव्यवस्थेवरही भाष्य केले. B. R. Ambedkar यांना शाळेत बसू दिले जात नव्हते, पण त्यांनी पुढे जाऊन देशाला संविधान दिले, असे उदाहरण देत त्यांनी समाजातील बदलाची गरज अधोरेखित केली. तसेच, जातीभेदाच्या भिंती तोडण्यासाठी आंतरधर्मीय विवाहाचे उदाहरण देताना “मी माझ्या मुलीचे लग्न ख्रिश्चन कुटुंबात केले,” असेही त्यांनी सभागृहात सांगितले.

चर्चेदरम्यान छत्रपती शिवाजी महाराज यांच्या राज्याभिषेकाचा उल्लेख करताना आव्हाड यांनी केलेल्या वक्तव्यावर सत्ताधारी पक्षातील आमदारांनी तीव्र आक्षेप घेतला. मंत्री शंभूराजे देसाई आणि आमदार योगेश सागर यांनी या वक्तव्याबाबत माफीची मागणी केली. भाजप आमदार वेलमध्ये उतरल्याने सभागृहात काही काळ गोंधळ निर्माण झाला आणि बैठक दहा मिनिटांसाठी तहकूब करण्यात आली.

यानंतर विधानसभा अध्यक्ष राहुल नारवेकर यांनी आव्हाड यांना दिलगिरी व्यक्त करण्याचे निर्देश दिले. त्यावर “जर कोणाच्या भावना दुखावल्या असतील तर मी माझे शब्द मागे घेतो आणि दिलगिरी व्यक्त करतो,” असे सांगत आव्हाड यांनी माफी मागितली. त्यानंतर अध्यक्षांनी संबंधित वक्तव्य कामकाजातून वगळण्याचे निर्देश दिले.