पिंपळे खालसात विजेच्या धक्क्याने मोराचा मृत्यू

शिक्रापूर (शेरखान शेख): पिंपळे खालसा (ता. शिरुर) येथील पद्मावती वस्ती येथे विद्युत रोहीत्राचा धक्का लागून एका मोराचा मृत्यू झाला असून वनविभाग व निसर्ग वन्यजीव सामाजिक संस्थेच्या माध्यमातून मोराचा पंचनामा करत शवविच्छेदन करत दहन करण्यात आले आहे.

पिंपळे खालसा (ता. शिरुर) येथील पद्मावती वस्ती येथील सुनील धुमाळ हे आज सकाळच्या सुमारास शेतात गेले असताना शेतातील विद्युत रोहित्राजवळ एक मोर पडलेला त्यांना दिसला. याबाबतची माहिती वनपरिक्षेत्र अधिकारी मनोहर म्हसेकर यांना मिळताच वनरक्षक बबन दहातोंडे, अभिजित सातपुते यांच्या माध्यमातून वनमजूर आनंदा हरगुडे, निसर्ग वन्यजीव सामाजिक संस्थेचे अध्यक्ष शेरखान शेख, अमोल कुसाळकर यांनी सदर ठिकाणी धाव घेत पाहणी केली असता विजेच्या धक्क्याने मोराचा मृत्यू झाल्याचे प्रथमदर्शनी दिसून आले.

यावेळी राजेंद्र धुमाळ, संदीप धुमाळ, तुषार धुमाळ, सुनील धुमाळ यांसह आदी उपस्थित होते. दरम्यान वनविभागाने सदर मोराचा पंचनामा करत त्याला ताब्यात घेत शवविच्छेदन करत मोराचे दहन केले आहे.