शिक्रापुरात नदीच्या कडेला कचरा फेकणाऱ्यांना गुलाबपुष्प

शिक्रापूर (शेरखान शेख): शिक्रापूर (ता. शिरुर) येथील वेळ नदीवरील पुलाची गावातील युवकांनी व्हाट्सअप ग्रुपच्या माध्यमातून एकत्र येत मी शिक्रापूरकर हि मोहीम सुरु करत पुलाची स्वच्छता करुन पुलाचे सुशोभीकरण करण्याचा निर्णय घेतला असताना पुन्हा येथे कचरा टाकण्यास सुरवात झालेली असल्याने आता गावातील युवकांनी कचरा टाकणाऱ्या नागरिकांना गुलाबपुष्प देत गांधीगिरी करत कचरा न टाकण्याबाबत समज देण्यास सुरवात केली आहे.

शिक्रापूर (ता. शिरुर) येथील शंभर हून अधिक युवकांनी व्हाट्सअप ग्रुपच्या माध्यमातून एकत्र येत मी शिक्रापूरकर हि मोहीम सुरु केली. नुकतेच येथील पुलाची स्वच्छता करुन मोहिमेला सुरवात करण्यात आलेली आहे. युवकांनी येथील सर्व परिसर स्वच्छ करुन येथील पुलाची रंगरंगोटी करुन सुशोभीकरण करण्याचा देखील निर्णय घेतला. मात्र काही नागरिक दुचाकीहून येऊन पुलावरुन पिशवीतून कचरा फेकत असल्याचे निदर्शनास आले.

त्यामुळे गावातील संतप्त युवकांनी सदर ठिकाणी पहारा लावत कचरा फेकणाऱ्या नागरिकांना गुलाबपुष्प देत गांधीगिरी मार्गाने कचरा न टाकण्याबाबत समाज देण्यास सुरवात केली आहे तर कचरा टाकणाऱ्या नागरिकांकडून दंड आकारुन त्यातून मिळणारी रक्कम पुलाच्या सुशोभीकरणासाठी वापरण्याचा निर्णय देखील युवकांनी घेतला आहे.