शिरूर नगर परिषदेची थकीत कर वसुली मोहीम तीव्र

थकीत मालमत्ता धारकांची नावे मुख्य चौकात प्रदर्शित करण्याचा निर्णय

शिरूर (अरुणकुमार मोटे): शिरूर नगर परिषद घोडनदीच्या करसंकलन विभागाने थकबाकीदारांविरुद्ध कठोर पावले उचलण्यास सुरुवात केली आहे. आर्थिक वर्ष संपण्यास काही दिवसच शिल्लक असल्याने कर वसुली मोहीम अधिक तीव्र करण्यात आली आहे.

नगर परिषदेच्या नियमानुसार, मालमत्ता कर व पाणीपट्टी दरवर्षी १ एप्रिल रोजी भरावा लागतो. तसेच, पहिल्या सहा महिन्यांच्या आत कर भरणे बंधनकारक आहे, अन्यथा महाराष्ट्र नगर परिषद, नगर पंचायत आणि औद्योगिक नगरी अधिनियम १९६५ च्या कलम १५० अ (१) नुसार थकबाकीदारांवर दरमहा २% शास्ती आकारली जाते. (दि. २५) मार्च २०२५ रोजी, नगर परिषदेच्या पथकाने मटन मार्केटमधील एका गाळ्याला सीलबंद करण्याची कारवाई मुख्याधिकारी प्रितम पाटील यांच्या मार्गदर्शनाखाली केली. यावेळी अक्षय बनगीनवार, दीपक कोल्हे, मोहन गुरव, तेजस शिंदे, अमृत भवर, भगवान आगोणे आणि इतर कर्मचारी उपस्थित होते. याशिवाय, थकीत पाणीपट्टीमुळे आतापर्यंत ६८ नळजोडण्या खंडित करण्यात आल्या आहेत. पुढील काळातही थकीत मालमत्तेची जप्ती तसेच नळ कनेक्शन खंडित करण्याची कारवाई सुरू राहणार आहे.

थकबाकीदारांची नावे मुख्य चौकात प्रदर्शित करण्याचा इशारा

नगर परिषदेकडून नागरिकांना वेळोवेळी कर भरण्यासाठी मोबाईल संदेश पाठवण्यात आले. तसेच, डिसेंबर २०२४ पासून शहरात १० घंटा गाडीच्या माध्यमातून दवंडीही दिली जात आहे. नागरिकांच्या सोयीसाठी सुट्टीच्या दिवशी (शनिवार, रविवार) देखील नवीन प्रशासकीय इमारतीतील नागरी सुविधा केंद्र तसेच जुन्या नगर परिषद कार्यालयात अतिरिक्त वसूली केंद्र सुरू ठेवण्यात आले आहे. त्याचबरोबर, नागरिकांना घरबसल्या “Shirurnp.org” या संकेतस्थळावरून ऑनलाईन कर भरण्याची सुविधा देखील देण्यात आली आहे.

मुख्याधिकारी प्रितम पाटील यांनी स्पष्ट शब्दांत सांगितले की, “थकीत कर न भरणाऱ्या मिळकत धारकांची नावे शहरातील मुख्य चौकात फलकांवर प्रदर्शित करण्यात येणार आहेत. त्यामुळे संभाव्य कारवाई टाळण्यासाठी नागरिकांनी त्वरित कर भरावा.”

नागरिकांनी वेळेत कर भरून दंड व कारवाई टाळावी

शिरूर नगर परिषदेकडून थकबाकीदारांसाठी कठोर भूमिका घेतली जात असली, तरी नागरिकांनी वेळेत कर भरून अनावश्यक कारवाई टाळावी, असे आवाहन प्रशासनाने केले आहे.

शिरूर नगर परिषद, घोडनदी