लग्नाचे आमिष दाखवून २६ वर्षीय तरुणीवर लैंगिक अत्याचार; तरुणाविरोधात गुन्हा दाखल

विरार: लग्नाचे आमिष दाखवत तब्बल दोन वर्षे एका २६ वर्षीय तरुणीवर लैंगिक अत्याचार केल्याचा धक्कादायक प्रकार उघडकीस आला आहे. या प्रकरणी मिरारोड येथील काशिगाव पोलीस ठाण्यात गुन्हा दाखल करण्यात आला असून पोलिसांनी तपासाला सुरुवात केली आहे.

पीडित तरुणी ही विरार परिसरात आपल्या कुटुंबासह वास्तव्यास आहे. सुमारे दोन वर्षांपूर्वी तिची मिरारोडच्या काशिगाव भागात राहणाऱ्या मोहम्मद एहसान अन्सारी (वय २६) याच्याशी ओळख झाली होती. सुरुवातीला मैत्रीच्या माध्यमातून दोघांमध्ये जवळीक वाढली. त्यानंतर आरोपीने तरुणीला प्रेमाच्या जाळ्यात ओढत लग्नाचे खोटे आश्वासन दिले आणि तिच्याशी वारंवार शारीरिक संबंध प्रस्थापित केले, असा आरोप पीडितेने तक्रारीत केला आहे.

या संपूर्ण कालावधीत आरोपीने सतत लग्नाचे आश्वासन देत तरुणीचा विश्वास संपादन केला. मात्र, दोन वर्षे उलटूनही लग्नाबाबत कोणतीही ठोस पावले उचलली जात नसल्याने तरुणीला संशय आला. अखेर आपली फसवणूक झाल्याचे स्पष्ट झाल्यानंतर तिने काशिगाव पोलीस ठाण्यात धाव घेत तक्रार दाखल केली.

पीडितेच्या तक्रारीच्या आधारे पोलिसांनी आरोपीविरोधात भारतीय न्याय संहितेच्या संबंधित कलमांखाली गुन्हा दाखल केला आहे. सध्या आरोपी फरार असून त्याचा शोध घेण्यासाठी पोलीस पथके रवाना करण्यात आली आहेत. आरोपीला लवकरच अटक करण्यात येईल, अशी माहिती पोलिस अधिकाऱ्यांनी दिली.