शिरुर तालुक्यात शाळकरी युवतीचा विनयभंग करणारा अटक

शिक्रापूर (शेरखान शेख): पाबळ (ता. शिरुर) येथे शालेय शिक्षण घेणाऱ्या अल्पवयीन युवतीला कार मध्ये घेऊन जात तिचा विनयभंग केल्याची घटना घडली असल्याने शिक्रापूर पोलिसांनी सरफराज शकील इनामदार या युवकावर गुन्हे दाखल करत त्याला अटक केली आहे.

पाबळ (ता. शिरुर) येथील अल्पवयीन युवती क्लासला जाण्यासाठी थांबलेली असताना गावातील सरफराज इनामदार हा युवक त्याच्या ताब्यातील एम एच १२ डी एफ ९९३० हि कार घेऊन सदर ठिकाणी येऊन तुझ्या भावाने तुला बोलावले आहे माझ्या सोबत चल, असे युवतीला म्हणून तिला कार मध्ये बसवून घेऊन गावातील चौधरी वस्ती येथे घेऊन जात युवतीचा हात पकडून युवतीचा विनयभंग केला. दरम्यान युवतीने मी माझ्या घरच्यांना सांगेल मला सोड असे म्हटले असता मी तुला गाडीमध्ये घेऊन आलो हे कोणाला सांगू नको नाहीतर याद राख अशी धमकी दिली.

याबाबत पिडीत युवतीच्या आईने शिक्रापूर पोलीस स्टेशन येथे फिर्याद दिली असल्याने शिक्रापूर पोलिसांनी सरफराज शकील इनामदार (वय २२) रा. चौधरी वस्ती पाबळ (ता. शिरुर) जि. पुणे याच्या विरुद्ध गुन्हे दाखल करत त्याला अटक केली असून पुढील तपास पोलीस निरीक्षक हेमंत शेडगे यांच्या मार्गदर्शनाखाली सहाय्यक पोलीस निरीक्षक वैभव स्वामी व पोलीस नाईक प्रताप कांबळे हे करत आहे.