शिरुर तालुक्यातील महाविद्यालयीन युवतीची होस्टेलमध्ये आत्महत्या…

शिक्रापूर (शेरखान शेख): जातेगाव बुद्रुक (ता. शिरुर) येथील श्री छत्रपती संभाजी राजे माध्यमिक व उच्च माध्यमिक विद्यालयाच्या होस्टेलमध्ये राहणाऱ्या सानिका बबन यनभर महाविद्यालयीन युवतीने गळफास घेऊन आत्महत्या केल्याची घटना घडली असल्याने शिक्रापूर पोलीस स्टेशन येथे आकस्मात मृत्यूची नोंद करण्यात आली आहे.

जातेगाव बुद्रुक (ता. शिरुर) येथील छत्रपती संभाजीराजे माध्यमिक व उच्च माध्यमिक विद्यालयात सानिका यनभर ही बारावीचे शिक्षण घेत असून ती संस्थेच्या हॉस्टेल मध्येच राहत होती. सायंकाळच्या सुमारास सानिकाच्या मैत्रिणी बाहेर गेलेल्या असताना सानिका होस्टेलच्या रुममध्ये एकटीच होती काही वेळाने मैत्रिणी परत आल्या असता दरवाजा बंद होता. त्यामुळे त्यांनी सानिकाला आवाज दिला मात्र आतून कोणताही प्रतिसाद येत नसल्याने तिच्या मैत्रिणींनी शेजारील नागरिकांना याबाबत माहिती दिली.

त्यावेळी काही नागरिकांनी दरवाजा तोडून आत मध्ये पाहिले असता सानिकाने छताला गळफास घेऊन आत्महत्या केल्याचे दिसून आले. यावेळी तिला उपचारासाठी शिक्रापूर येथील रुग्णालयात आणले असता डॉक्टरांनी सानिका बबन यनभर (वय १७) रा. बर्केगाव ता. हवेली जि. पुणे हिचा मृत्यू झाल्याचे घोषित केले.

याबाबत नवनाथ गुलाब सांवत (वय ३९) रा. कुंजीरवाडी ता. हवेली जि. पुणे यांनी शिक्रापूर पोलीस स्टेशन येथे खबर दिले असल्याने शिक्रापूर पोलिसांनी आकस्मात मृत्यूची नोंद केली असून सदर घटनेचा पुढील तपास पोलीस निरीक्षक हेमंत शेडगे यांच्या मार्गदर्शनाखाली पोलीस नाईक बापू हडागळे करत आहे.