किरकोळ वादातून शेतकरी महिलेवर लोखंडी वस्तूने हल्ला; खांदा फ्रॅक्चर

शिरूर (ओमकार भोरडे): शेतात ट्रॅक्टर का घातला आणि मुलाला मारहाण का केली, याचा जाब विचारण्यासाठी गेलेल्या शेतकरी महिलेवर लोखंडी वस्तूने हल्ला करून गंभीर जखमी केल्याची घटना कवठे यमाई हद्दीतील इचकेवाडी येथे घडली आहे.

याबाबत कवठे यमाई (ता. शिरूर) येथील रहिवासी सुहास अनिल इचके (वय ३५, व्यवसाय-शेती) यांनी शिरूर पोलीस ठाण्यात फिर्याद दिली आहे. त्यानुसार, ३१ मे रोजी सायंकाळी ६ वाजल्यापासून ते ५ जून रोजी सायंकाळी ५.२५ वाजेपर्यंतच्या कालावधीत हा प्रकार घडला.

फिर्यादीनुसार, आरोपी दिपक बरवे (पूर्ण नाव माहित नाही, मूळ रा. सोनपेठ, ता. सोनपेठ, जि. परभणी, सध्या रा. कवठे यमाई, ता. शिरूर) याने फिर्यादीच्या मुलाला मारहाण केली होती तसेच शेतात ट्रॅक्टर घातल्याचा आरोप होता. याबाबत जाब विचारण्यासाठी सुहास इचके व त्यांची आई सुनिता अनिल इचके हे आरोपीच्या घरासमोर गेले होते.

यावेळी आरोपीने संतापून सुनिता इचके यांच्या डोक्यात व डाव्या खांद्यावर लोखंडी वस्तूने वार करून मारहाण केली. या हल्ल्यात त्यांचा डावा खांदा फ्रॅक्चर झाला असून डोक्यालाही गंभीर दुखापत झाली आहे.या प्रकरणी शिरूर पोलीस ठाण्यात ७ जून रोजी गुन्हा दाखल करण्यात आला असून पोलीस निरीक्षक संदेश केंजळे यांच्या मार्गदर्शनाखाली पोलीस हवालदार उबाळे पुढील तपास करत आहेत.