धामारीत दुधाच्या टँकरच्या धडकेत एक ठार एक गंभीर

शिक्रापूर (शेरखान शेख): धामारी (ता. शिरुर) येथे दुधाच्या टँकरच्या धडकेत एक व्यक्ती ठार तर एक गंभीर जखमी झाल्याची घटना घडली आहे. मच्छिंद्र गुलाब पुंडे असे मयत झालेल्या व्यक्तीचे नाव असून भरत महादेव गोपाळे या टँकर चालकावर शिक्रापूर पोलीस स्टेशन येथे गुन्हे दाखल करण्यात आले आहे.

धामारी (ता. शिरुर) येथील कान्हूर मेसाई धामारी रस्त्याने मच्छिंद्र पुंडे व अंकुश डफळ हे दोघे त्यांच्या ताब्यातील एम एच १२ एस झेड ५४७५ या दुचाकीहून चाललेले असताना धामारी चौकातील सातपुते हॉटेल समोरुन रस्ता ओलांडत असताना अचानक पाबळ बाजूने शिक्रापूरकडे जाणाऱ्या एम एच १७ बी वाय ९७९६ या दुधाच्या टँकरची दुचाकीला धडक बसून अपघात झाला.

यावेळी अपघातात मच्छिंद्र गुलाबराव पुंडे (वय ५२) रा. कान्हूर मेसाई (ता. शिरुर) जि. पुणे यांचा जागीच मृत्यू झाला तर दुचाकीवर पाठीमागे बसलेले अंकुश तुकाराम डफळ रा. कान्हूर मेसाई (ता. शिरुर) जि. पुणे हे गंभीर जखमी झाले असून याबाबत राहुल नाथाभाऊ पुंडे (वय ३3) रा. कान्हूर मेसाई (ता. शिरुर) जि. पुणे यांनी शिक्रापूर पोलीस स्टेशन येथे फिर्याद दिली असल्याने शिक्रापूर पोलिसांनी टँकर चालक भरत महादेव गोपाळे रा. साबुर्डी ता. खेड जि. पुणे याच्या विरुद्ध गुन्हे दाखल केले असून सदर गुन्ह्याचा पुढील तपास पोलीस तपास सहाय्यक पोलीस उपनिरीक्षक विजय चौधर हे करत आहे.