‘मोहिनी’ची एन्ट्री! २३ मार्चपासून ‘कलर्स मराठी’वर नवी मालिका;

मुंबई: कलर्स मराठी वर येत्या काही दिवसांत दोन नव्या मालिका प्रेक्षकांच्या भेटीला येणार आहेत. यापैकी ‘मी जिंकून घेईन सारं’ ही मालिका १६ मार्चपासून ऑन एअर होणार आहे. तर ‘मोहिनी’ या नव्या मालिकेची प्रदर्शनाची तारीख आणि वेळ वाहिनीने अधिकृतपणे जाहीर केली आहे.

“स्वाभिमान आणि अहंकाराच्या या लढाईत नेमकं कोण जिंकणार?” मोहिनी की RK? असा अनोखा संघर्ष या मालिकेत पाहायला मिळणार आहे. दरम्यान, सोशल मीडियावर अनेक प्रेक्षकांनी ही मालिका मधुबाला – एक इश्क एक जुनून या लोकप्रिय हिंदी मालिकेचा रिमेक असल्याची चर्चा केली आहे. ही मालिका २०१२ मध्ये कलर्स टीव्ही वर प्रसारित झाली होती आणि प्रेक्षकांनी तिला भरभरून प्रतिसाद दिला होता.

‘मोहिनी’चा पहिला प्रोमो पाहिल्यानंतरही नेटकऱ्यांनी ही मालिका ‘मधुबाला’चा रिमेक असल्याच्या कमेंट्स केल्या आहेत. त्यामुळे मराठी प्रेक्षकांकडून या मालिकेला कसा प्रतिसाद मिळतो, हे पाहणं महत्त्वाचं ठरणार आहे.

कोणती मालिका संपू शकते?

‘मोहिनी’ ही मालिका २३ मार्चपासून संध्याकाळी ७:३० वाजता प्रसारित होणार आहे. सध्या या वेळेत जय जय स्वामी समर्थ ही मालिका दाखवली जाते. सध्या या मालिकेत स्वामी समर्थांच्या महानिर्वाणाचा भावपूर्ण अध्याय दाखवला जात असल्याने लवकरच ही मालिका प्रेक्षकांचा निरोप घेईल, अशी चर्चा आहे. मात्र याबाबत वाहिनीने अद्याप अधिकृत घोषणा केलेली नाही.

फ्रेश जोडी झळकणार

‘मोहिनी’ मालिकेत एक नवी जोडी प्रेक्षकांना पाहायला मिळणार आहे. लोकप्रिय अभिनेत्री अनघा ठाकूर मुख्य नायिकेच्या भूमिकेत झळकणार असून तिच्यासोबत अभिनेता समीर परांजपे मुख्य भूमिकेत दिसणार आहे. ‘सुंदरा मनामध्ये भरली’ या मालिकेमुळे समीर घराघरांत पोहोचला होता. तसेच स्टार प्रवाह वरील ‘थोडं तुझं आणि थोडं माझं’ मालिकेतही त्याने प्रमुख भूमिका साकारली होती.

दरम्यान, मालिकेची लॉन्च डेट जाहीर होताच शर्वरी जोग, प्रतीक्षा मुणगेकर, समृद्धी केळकर, महिमा म्हात्रे, हृषिकेश शेलार आणि अभिषेक रहाळकर या कलाकारांनी सोशल मीडियावर कमेंट्स करत ‘मोहिनी’च्या टीमला शुभेच्छा दिल्या आहेत.