शिरूरमध्ये कृषी सेवा केंद्रात कोयता व कात्रीने दहशत; तिघांविरोधात गुन्हा दाखल

शिरूर (अरुणकुमार मोटे): शिरूर शहरातील विशाल कृषी सेवा केंद्रात कोयता व कात्री घेऊन तिघांनी दहशत माजवत एका व्यक्तीवर वार केल्याची धक्कादायक घटना समोर आली आहे. “आमच्याविरोधात तहसील कार्यालयात तक्रार करतोस का?” असे म्हणत तिघांनी एकावर हल्ला केला असून, याप्रकरणी तिघांविरोधात शिरूर पोलीस ठाण्यात गुन्हा दाखल करण्यात आला आहे.

यासंदर्भात संतोष बाळू पाचर्णे (वय ४२) व्यवसाय मजुरी, रा. जांभळी मळा, तरडोबाची वाडी, ता. शिरूर, जि. पुणे) यांनी शिरूर पोलीस ठाण्यात फिर्याद दिली आहे.फिर्यादीवरून परवेश उर्फ पाप्या पठाण (पूर्ण नाव माहिती नाही), रुपेश चित्ते (पूर्ण नाव माहिती नाही) आणि ओंकार दत्तात्रय जाधव (सर्व रा. तरडोबाची वाडी, ता. शिरूर, जि. पुणे) या तिघांविरोधात गुन्हा दाखल करण्यात आला आहे.

पोलीसांनी दिलेल्या माहितीनुसार, (दि. ५) एप्रिल २०२५ रोजी दुपारी दोनच्या सुमारास विशाल कृषी सेवा केंद्रात फिर्यादी संतोष पाचर्णे व मालक शिवम शिंदे काम करत असताना, वरील तिघे आरोपी दुकानात आले. त्यावेळी ओंकार जाधव यांनी “तुला लय मस्ती आली का? आमची तक्रार तहसील ऑफिसला करतोस काय? आता दाखवतोच तुला…” असे म्हणत दमदाटी केली. त्यानंतर पाप्या पठाण याने फिर्यादीला हाताने तसेच कात्रीने उजव्या हातावर व पायावर मारहाण केली.

रुपेश चित्ते याने कोयता फिरवत परिसरातील दुकानदारांमध्ये दहशत निर्माण केली, त्यामुळे दुकाने बंद करण्यात आली व लोकांनी पळ काढला. त्यानंतर दुकानात येऊन फिर्यादीच्या डोक्यामागील बाजूस वार करण्यात आला. शिवम शिंदे व फिर्यादी यांनी आरडाओरड करताच आरोपी घटनास्थळावरून पळून गेले.या घटनेप्रकरणी तिघांविरोधात गुन्हा दाखल करण्यात आला असून, पुढील तपास पोलीस निरीक्षक संदेश केंजळे यांच्या मार्गदर्शनाखाली सहाय्यक फौजदार साबळे करत आहेत.