शासकीय कामात अडथळा, शिरूरमध्ये पाणीपुरवठा कर्मचार्‍यावर हल्ला

आरोपीविरुद्ध शिरूर पोलीस ठाण्यात गुन्हा दाखल

शिरूर (अरूणुकमार मोटे): शिरूर ग्रामीण ग्रामपंचायतीच्या शासकीय पाणीपुरवठा योजनेसाठी चारी खोदण्याचे काम सुरू असताना एका इसमाने सरकारी कर्मचाऱ्यांवर हल्ला करत कामात अडथळा आणल्याची घटना घडली आहे. या प्रकरणी शिरूर पोलीस ठाण्यात संबंधित व्यक्तीविरोधात गुन्हा दाखल करण्यात आला आहे.

पोलिसांनी दिलेल्या माहितीनुसार, फिर्यादी अंकुश माणिक कु-हाडे (वय ४१ वर्ष ) व्यवसाय – पाणीपुरवठा, ग्रामपंचायत शिरूर ग्रामीण हे दिनांक २ एप्रिल रोजी दुपारी २ वाजता रामलिंग रोड, श्रीनिवास सोसायटी, शिरूर येथे जेसीबीच्या सहाय्याने चारी खोदण्याचे शासकीय काम करत होते. यावेळी आरोपी अमित जयंत डोंगरे (रा. श्रीनिवास सोसायटी, रामलिंग रोड, शिरूर) याने आपल्या घरासमोरील पाईपचे काम का झाले नाही, या कारणावरून आक्षेप घेत कामात अडथळा निर्माण केला.

आरोपीने फिर्यादी अंकुश कु-हाडे यांच्या कंबरेवर आणि मानेवर दगड मारून जखमी केले. तसेच त्यांच्यासोबत असलेल्या जेसीबी सुपरवायझर नाथा सुदाम शिंदे (रा. देवदैठण, ता. श्रीगोंदा, जि. अहिल्यानगर) यांनाही मारहाण केली. याशिवाय आरोपीने सुपरवायझरला सोसायटीतील प्रत्येक घरासमोर उठाबशा काढण्यास भाग पाडले. त्यामुळे शिरूर ग्रामपंचायतीकडून तीव्र निषेध व्यक्त केला जात आहे. यावेळी आरोपीने मोटारसायकल (क्रमांक MH-12-CZ-9623) वर दगड मारून नुकसान केले आणि सरकारी काम थांबवण्याचा प्रयत्न केला.या प्रकरणी शिरूर पोलीस ठाण्यात आरोपीविरुद्ध गुन्हा दाखल करण्यात आला आहे. या गुन्हयाचा पुढील तपास पोलीस हवालदार राऊत करीत आहे.