तळेगाव ढमढेरेत व्याजाच्या पैशासाठी फळ विक्रेत्याचे अपहरण

शिक्रापूर (शेरखान शेख) तळेगाव ढमढेरे (ता. शिरुर) येथील एका फळ विक्रेत्यास व्याजाने पैसे देऊन व्याजाचे पैसे दिले नाही म्हणून फळ विक्रेत्याचे अपहरण केल्याची धक्कादायक घटना घडली असुन याप्रकरणी शिक्रापूर पोलीस स्टेशन येथे अनिल ढमढेरे या इसमावर गुन्हे दाखल करण्यात आले आहे.

तळेगाव ढमढेरे येथील वसीम बागवान या फळविक्रेत्याने गावातील अनिल ढमढेरे या इसमाकडून 1लाख 90 हजार रुपये घेतले होते. सदर पैशाच्या बदल्यात प्रत्येक आठवड्यात 19 हजार रुपये असे 15 हप्ते देण्याचे ठरले होते. बागवान यांनी 9 हप्ते पैसे दिले. त्यांनतर पैसे देण्यास विलंब झाल्याने अनिल ढमढेरे बागवान यांना वारंवार फोन करुन पैशाची मागणी करत होता. त्यांनतर २३ ऑगस्ट रोजी अनिल हा त्याच्या एम एच १२ ६४७७ या फॉरच्यूनर कार मधून बागवान याच्या घरी गेला आणि वसीमकडे पैशाची मागणी करु लागला यावेळी अनिल याने माझे व्याजाचे 1 लाख रुपये राहिले आहेत ते मला दे नाहीतर तुला दाखवतोच अशी धमकी दिली. त्यांनतर तो वसीम याला त्याच्या फॉरच्यूनर कार मध्ये बसवून घेऊन गेला.

त्यांनतर वसीम घरी परतलाच नाही किंवा त्याच्याशी संपर्कही झाला नाही. तसेच वसीम याची पत्नी व भावाने अनिल याला फोन केला असता त्याने देखील फोन उचलले नाहीत. तसेच बागवान यांनी त्यांच्या नातेवाईकांसह अनेक ठिकाणी वसीमचा शोध घेतला. मात्र तो कुठच मिळून आला नाही. याबाबत निलोफर वासिम बागवान (वय ३६) रा. शिक्षक भवन जवळ, तळेगाव ढमढेरे (ता. शिरुर जि. पुणे) यांनी शिक्रापूर पोलीस स्टेशन येथे फिर्याद दाखल केली असल्याने शिक्रापूर पोलिसांनी अनिल ढमढेरे ( पूर्ण नाव नाही ) रा. तळेगाव ढमढेरे ता. शिरुर जि. पुणे या सावकारावर गुन्हे दाखल केले असून सदर गुन्ह्याचा पुढील तपास पोलीस निरीक्षक हेमंत शेडगे यांच्या मार्गदर्शनाखाली सहाय्यक पोलीस निरीक्षक वैभव स्वामी हे करत आहे.