चेहऱ्याच्या सौंदर्यासाठी कॉफी-दूध उपाय ठरतोय लोकप्रिय; जाणून घ्या फायदे आणि योग्य वापर

आजच्या धावपळीच्या जीवनात केमिकलयुक्त सौंदर्यप्रसाधनांऐवजी नागरिकांचा कल नैसर्गिक उपायांकडे वाढताना दिसत आहे. त्यातच चेहऱ्याच्या त्वचेच्या काळजीसाठी कॉफी आणि दूध यांचा वापर मोठ्या प्रमाणावर केला जात असून हा उपाय सध्या सोशल मीडियावरही चांगलाच चर्चेत आहे.

तज्ज्ञांच्या मते, कॉफी आणि दूध यांचे मिश्रण फेस पॅक किंवा स्क्रब म्हणून वापरल्यास त्वचेला अनेक प्रकारे लाभ होऊ शकतो. कॉफीतील कण त्वचेवरील मृत पेशी काढून टाकण्यास मदत करतात, त्यामुळे त्वचा स्वच्छ व मऊ होते. तसेच कॉफीमधील कॅफिन रक्ताभिसरण सुधारत असल्याने डोळ्यांखालील काळी वर्तुळे आणि सूज कमी होण्यास मदत मिळते.

दुसरीकडे, दुधामध्ये असलेले लॅक्टिक ॲसिड त्वचेचा रंग उजळवण्यास मदत करते. उन्हामुळे आलेला काळपटपणा (टॅन) कमी होणे, तसेच काळे डाग हलके होण्यास या उपायाचा उपयोग होतो. दूध हे नैसर्गिक मॉइश्चरायझर असल्याने कोरड्या त्वचेसाठी हा उपाय विशेष फायदेशीर मानला जात आहे.

फेस पॅक कसा तयार करावा?

एक चमचा कॉफी पावडर आणि एक ते दोन चमचे कच्चे दूध एकत्र करून पेस्ट तयार करावी. ही पेस्ट चेहऱ्यावर लावून १० ते १५ मिनिटे ठेवावी. त्यानंतर हलक्या हाताने मसाज करत कोमट पाण्याने चेहरा धुवावा.

मात्र, त्वचा अतिसंवेदनशील असल्यास किंवा कोणतीही त्वचारोगाची समस्या असल्यास हा उपाय करण्यापूर्वी तज्ज्ञ डॉक्टरांचा सल्ला घेणे आवश्यक असल्याचेही आरोग्य तज्ज्ञ सांगतात.