केरळमध्ये शिवसेनेचा विस्तार; ‘८० टक्के सामाजिक सेवा, २० टक्के राजकीय काम’ मॉडेलवर भर

तिरुवनंतपुरम : केरळमध्ये संघटनात्मक विस्ताराला वेग देताना शिवसेनेने सामाजिक सेवेला प्राधान्य देण्याची भूमिका स्पष्ट केली आहे. ‘८० टक्के सामाजिक सेवा आणि २० टक्के राजकीय काम’ या मॉडेलच्या माध्यमातून जनतेशी थेट संपर्क वाढविण्यावर पक्षाचा भर असल्याचे शिवसेनेच्या राष्ट्रीय सचिव आणि राष्ट्रीय प्रवक्त्या शाइना एनसी यांनी सांगितले.

तिरुवनंतपुरम प्रेस क्लबमध्ये शुक्रवारी आयोजित पत्रकार परिषदेत त्यांनी केरळमधील पक्षाच्या संघटनात्मक विस्ताराची माहिती दिली. केरळच्या जनतेसोबत सातत्याने काम करत समावेशक विकास, जमिनीवरील संघटन मजबूत करणे आणि सार्वजनिक कल्याणाच्या माध्यमातून ‘विकसित भारत’च्या राष्ट्रीय दृष्टीकोनाला हातभार लावण्याचा पक्षाचा प्रयत्न असल्याचे त्यांनी स्पष्ट केले.

शाइना एनसी यांच्या केरळ दौऱ्याची सुरुवात पक्ष कार्यकर्त्यांसोबतच्या संवादातून झाली. यावेळी महाराष्ट्राचे उपमुख्यमंत्री एकनाथ शिंदे आणि खासदार डॉ. श्रीकांत शिंदे यांच्या शासनाच्या मॉडेलवर तसेच संघटनात्मक विस्ताराच्या रणनीतीवर चर्चा झाली. राष्ट्रीय एकात्मता, जनकल्याण आणि स्थानिक पातळीवरील संघटन मजबूत करण्यावर यावेळी भर देण्यात आला.

तीन दशकांपासून सामाजिक सेवेला प्राधान्य

केरळचे राज्यप्रमुख अॅड. पेरुरकडा हरिकुमार यांनी सांगितले की, १९९०-९१ पासून केरळमध्ये शिवसेनेचे काम सुरू असून सामाजिक आणि मानवतावादी उपक्रमांना पक्षाने प्राधान्य दिले आहे. १९९६ मध्ये शिवसेनाप्रमुख बाळासाहेब ठाकरे यांच्या हस्ते केरळमध्ये पहिली मोफत रुग्णवाहिका सेवा सुरू करण्यात आली होती. गेल्या तीन दशकांपासून ही सेवा गरजू रुग्ण आणि कुटुंबांना मदत करत असल्याचा दावा त्यांनी केला.

याशिवाय मोफत रक्तदान शिबिरे, अन्नदान तसेच गरजू विद्यार्थ्यांना शैक्षणिक साहित्याचे वाटप अशा विविध उपक्रमांचे आयोजन पक्षाकडून करण्यात येत असल्याचेही त्यांनी सांगितले.

सबरीमला प्रश्नावरही भूमिका

सामाजिक सेवेसोबतच धार्मिक श्रद्धा, परंपरा आणि सांस्कृतिक वारशाच्या मुद्द्यांवरही शिवसेनेने भूमिका घेतल्याचे पक्षाकडून सांगण्यात आले. विशेषतः सबरीमला संबंधित प्रश्नांवर पक्षाने लोकशाही मार्गाने भूमिका मांडल्याचा दावा करण्यात आला. नागरिकांचे हक्क आणि सांस्कृतिक वारसा जपण्यासाठी लोकशाही चौकटीत काम करण्याची भूमिका पक्षाने स्पष्ट केली.

एनडीएसोबत समन्वय वाढविण्यावर भर

राष्ट्रीय लोकशाही आघाडीचा (एनडीए) घटक म्हणून केरळमध्ये शिवसेना संघटनात्मक विस्तार करत आहे. अलीकडील स्थानिक स्वराज्य संस्थांच्या निवडणुकांमध्ये एनडीएला मिळालेल्या यशामुळे राज्यात आघाडीबाबत जनतेचा विश्वास वाढत असल्याचा दावा पक्षाच्या नेतृत्वाने केला.

केरळमधील राजकीय आणि संघटनात्मक कामाला आणखी गती देण्यासाठी राज्यातील सर्व १४ जिल्ह्यांमध्ये पक्षाची संघटना मजबूत करण्याचे उद्दिष्ट असल्याचे शाइना एनसी यांनी सांगितले. राष्ट्रीय नेतृत्वाच्या मार्गदर्शनाखाली स्थानिक कार्यकर्त्यांच्या माध्यमातून पक्षाचा जनसंपर्क वाढविला जाणार आहे.

राज्यव्यापी संघटन मजबूत करण्याचा निर्धार

केरळमधील संघटनात्मक समन्वयाची जबाबदारी दक्षिण भारत संघटन सचिव एम. एस. भुवनाचंद्रन यांच्याकडे असून, स्थानिक पातळीवरील अंमलबजावणीची जबाबदारी राज्यप्रमुख अॅड. पेरुरकडा हरिकुमार यांच्याकडे आहे. एकनाथ शिंदे यांच्या नेतृत्वाखाली आणि डॉ. श्रीकांत शिंदे यांच्या प्रयत्नांतून केरळमध्ये संघटन विस्ताराचे काम सुरू असल्याचे पक्षाने सांगितले.

केरळच्या सर्व १४ जिल्ह्यांमध्ये संघटन मजबूत करून शिवसेना आणि एनडीएला राज्याच्या भविष्यातील विकासात प्रभावी शक्ती बनविण्याचा विश्वास शाइना एनसी यांनी व्यक्त केला.