चित्रनगरीतील अधिकारी- कर्मचाऱ्यांनी गिरवले व्यवस्थापनाचे धडे

मुंबई: महाराष्ट्र चित्रपट, रंगभूमी आणि सांस्कृतिक विकास महामंडळातील अधिकारी, कर्मचारी आणि सल्लागाराकरिता महामंडळाच्या व्यवस्थापकीय संचालक स्वाती म्हसे-पाटील यांच्या मार्गदर्शनाखाली अलिबाग येथे ही दोन दिवशीय कार्यशाळा संपन्न झाली.

प्रकल्प व्यवस्थापन, आर्थिक नियोजन व बजेटिंग, कार्य–जीवन संतुलन, कार्यस्थळी तंत्रज्ञान, अपग्रेडेशन व कृत्रिम बुद्धिमत्तेच्या वापराबाबत केतन गावंड यांनी मार्गदर्शन केले. पहिल्या दिवसाचा समारोप `टीम बाँडिंग’साठी अनौपचारिक `कराओके’ सत्राने झाला.

प्रशिक्षण वर्गाच्या दुसऱ्या दिवशी सर्जनशीलता व डिजिटल जागरूकतेवर भर देण्यात आला. संवेदी म्हात्रे व ओंकार पाटील यांनी समूह चित्रकला उपक्रम घेतला. तर मुकुंद नाडगौडा यांनी डिजिटल व सायबर सुरक्षेवर सुशासनाच्या दृष्टीने मार्गदर्शन केले. या वेळी संस्थात्मक सुधारणा विषयावर खुली चर्चा झाली. त्यात अनेक कर्मचाऱ्यांनी अनेक कल्पक सूचना मांडल्या.

दोन दिवसांच्या प्रशिक्षण वर्गाला सहव्यवस्थापकीय संचालक प्रशांत साजणीकर व मुख्य प्रशासकीय अधिकारी गीता देशपांडे यांची विशेष उपस्थिती लाभली. या प्रशिक्षणाचे नियोजन महामंडळाच्या मुख्य वित्त अधिकारी चित्रलेखा खातू यांनी केले.