सेंट जोसेफ इंटरनॅशनल स्कूलच्या सोहम अभिषेक जाधव यांची चमकदार कामगिरी,शालेय कॅरम स्पर्धेत राज्यस्तरीय निवड

शिरूर (अरुणकुमार मोटे): क्रीडा युवक सेवा संचलनालय महाराष्ट्र राज्य पुणे, अंतर्गत क्रीडा परिषद व जिल्हा क्रीडा कार्यालय अहिल्यानगर आणि साईबाबा संस्थान विश्वस्त व्यवस्था शिर्डी आयोजित कॅरम स्पर्धा, वयोगट १४ या स्पर्धेसाठी पुणे, अहमदनगर आणि सोलापूर या तीन जिल्ह्यांमधून पार पडलेल्या कॅरम स्पर्धा निवड प्रक्रियेतून सोहम अभिषेक जाधव याने उल्लेखनीय यश मिळवून राज्यस्तरीय शालेय कॅरम स्पर्धेसाठी निवड निश्चित केली आहे. त्याच्या या यशामुळे विद्यालयाचे चेअरमन मा. अनिल पायस सर व मुख्याध्यापिका नॅन्सी पायस यांनी त्याचे विशेष कौतुक केले.

सोहम हा सेंट जोसेफ इंटरनॅशनल स्कूल, शिरूर येथे इयत्ता ८वी चा विद्यार्थी असून, त्यांच्या मेहनतीचे आणि सातत्यपूर्ण प्रयत्नांचे फळ त्यांना या मोठ्या व्यासपीठावर मिळाले आहे.अहिल्यानगर क्रीडा शिक्षण अधिकारी ज्ञानेश्वर खुरंगे देखील सोहमच्या या यशाचे कौतुक केले. या स्पर्धेसाठी अभिषेक जाधव सर यांनी मार्गदर्शन केले आहे.

स्पर्धेदरम्यान सोहमने दाखविलेली कौशल्य, शिस्तबद्धता आणि आत्मविश्वास यामुळे परीक्षकांनी त्यांची निवड राज्यस्तरीय पातळीवर केली. मुख्याध्यापकांनी तसेच त्यांच्या शिक्षकांनी आणि पालकांनी या यशाबद्दल अभिमान व्यक्त केला असून पुढील पायरीतही सोहम उत्कृष्ट कामगिरी करतील, असा विश्वास व्यक्त केला आहे. सोहमच्या या यशामुळे शाळेचे नाव उज्ज्वल झाले असून, शिरूर तालुक्यातील विद्यार्थ्यांसाठीही हे प्रेरणादायी ठरले आहे.