हिवरे कुंभार मध्ये आढळला लोणीकंदच्या मुख्याध्यापकांचा मुतदेह

शिक्रापूर (शेरखान शेख): हिवरे कुंभार (ता. शिरुर) येथील एका विहिरीमध्ये लोणीकंद प्राथमिक शाळेच्या मुख्याध्यापकांचा संशयास्पद मृतदेह आढळून आल्याने खळबळ उडाली असून शिक्रापूर पोलीस स्टेशन येथे आकस्मात मृत्यूची नोंद करण्यात आली आहे.

हिवरे कुंभार (ता. शिरुर) येथील मुळचे रहिवाशी असलेले हनुमंत हरेल हे लोणीकंद येथील प्राथमिक शाळेमध्ये मुख्याध्यापक पदावर असून पाच डिसेंबर रोजी दुपारच्या सुमारास हरेल हे अचानक शाळेतून गेले होते. त्यानंतर ते घरी देखील परतले नाही. त्यामुळे ते नृसिंहवाडी येथे दत्त जयंतीसाठी गेले असावे असे त्यांच्या कुटुंबियांना वाटले मात्र ते घरी न आल्याने त्यांच्या कुटुंबीयांनी लोणीकंद पोलीस स्टेशन येथे तक्रार दिलेली होती. याबाबत तपास सुरु असताना 11 डिसेंबर रोजी हिवरे कुंभार येथे एम एच १२ एल जि ७१३७ हि दुचाकी शेतात उभी असल्याचे तसेच विहिरीमध्ये एका इसमाचा मृतदेह असल्याचे काही नागरिकांना दिसले.

याबाबतची माहिती मिळताच शिक्रापूर पोलिसांनी सदर ठिकाणी जात पाहणी केली असता विहिरीमध्ये लोणीकंद प्राथमिक शाळेचे मुख्याध्यापक हनुमंत रामदास हरेल (वय ५3) रा. एकनाथ पठारे वस्ती चंदननगर पुणे मूळ रा. हिवरे कुंभार (ता. शिरुर) जि. पुणे यांचा मृतदेह आढळून आला. याबाबत शशी हनुमंत हरेल (वय ३२) रा. एकनाथ पठारे वस्ती चंदननगर पुणे मूळ रा. हिवरे कुंभार (ता. शिरुर) जि. पुणे यांनी शिक्रापूर पोलीस स्टेशन येथे खबर दिली असल्याने शिक्रापूर पोलिसांनी आकस्मात मृत्यूची नोंद केली असून हरेल यांची आत्महत्या कि हत्या याबाबत काहीही माहिती मिळू शकली नसून पुढील तपास पोलीस निरीक्षक हेमंत शेडगे यांच्या मार्गदर्शनाखाली पोलीस हवालदार मंगेश लांडगे हे करत आहे.