शिरुर तालुक्यात दिवसाढवळ्या घरफोडी करुन लाखों रुपयांचा ऐवज लंपास

शिरुर (तेजस फडके): शिरुर पोलिस स्टेशनच्या हद्दीत दिवसेंदिवस घरफोडी करुन रोख रकमेसह लाखों रुपयांचे सोन्याचे ऐवज चोरीला जात आहेत. त्यामुळे गुन्हेगारांना नक्की “कायद्याचा धाक” उरला आहे की नाही हा संशोधनाचा विषय असुन सध्या शिरुर पोलिस स्टेशनच्या हद्दीत चोरटे रात्री ऐवजी दिवसाढवळ्या घरफोडी करु लागले असुन गेल्या काही दिवसांपासुन शिरुर पोलिसांचे वेगवेगळे कारनामे पुढे येत असल्याने कायदा आणि सुव्यवस्था पुर्णपणे बिघडल्याचे चित्र दिसत आहे. नागरगाव (ता. शिरुर) येथे लग्नाला गेलेल्या कुटुंबाच्या घरात भर दुपारी लाखोंची चोरी करुन चोर पसार झाले आहेत.

याबाबत सूत्रांच्या माहितीनुसार मंगळवार (दि 4) रोजी दुपारी 12:30 ते 1:30 च्या सुमारास तीन ठिकाणी चोरीच्या घटना घडल्या असुन शिरुर-चौफुला रोडवर नागरगाव हद्दीत असलेल्या एकनाथ नलगे यांच्या घरात अज्ञात चोरट्याने प्रवेश करत घरातील रोख रक्कम चोरुन नेली. तर संतोष नलगे यांच्या घरातून सोने- चांदीच्या मौल्यवान ऐवजाची चोरी केली असल्याने नागरगाव परिसरात चोरांनी दिवसाढवळ्या चोरी केल्याने आसपासच्या नागरिकांमध्ये घबराट निर्माण झाली आहे.

नागरगाव येथील नलगे कुटुंबीय हे लग्नानिमित्त जवळच असलेल्या मंगल कार्यालयात गेले होते. याचाच फायदा घेत अज्ञात चोरट्यांनी रस्त्यालगत असलेल्या तीन घरात भर दुपारी घरफोडी करत चोरी करत 5 तोळे सोन्याचे दागिने आणि दिड लाखांची रोख रक्कम असा 3 लाख 86 हजारांचा ऐवज चोरुन पोबारा केल्याची घटना घडली असुन याबाबत एकनाथ विष्णू नलगे (रा.नलगेवस्ती, नागरगाव ता. शिरुर जि. पुणे) यांनी शिरुर पोलीस ठाण्यात फिर्याद दिली असून पोलिसांनी अज्ञात चोरट्याच्या विरोधात गुन्हा दाखल केला आहे. या घटनेचा पुढील तपास पोलीस उपनिरीक्षक एकनाथ पाटील करत आहेत.