तळेगाव ढमढेरेत वाहनाच्या धडकेत एका व्यक्तीचा मृत्यू

शिक्रापूर (शेरखान शेख): तळेगाव ढमढेरे (ता. शिरुर) येथील गीताई हॉटेल समोर अज्ञात वाहनाच्या धडकेत एका व्यक्तीचा मृत्यू झाल्याने शिक्रापूर पोलीस स्टेशन येथे अज्ञात वाहन चालकावर गुन्हे दाखल करण्यात आले आहे.

तळेगाव ढमढेरे (ता. शिरुर) येथील गीताई हॉटेल समोरुन संतोष बढेकर हे त्यांच्या ताब्यातील एम एच १२ ई सि ६४८८ या दुचाकीहून जात असताना तळेगाव ढमढेरे बाजूने आलेल्या एका अज्ञात वाहनाची बढेकर यांना धडक बसून अपघात झाला. या अपघातात बढेकर हे जखमी झाल्याने त्यांना शिक्रापूर येथील हॉस्पिटलमध्ये उपचारासाठी दाखल करण्यात आले.

मात्र उपचारापूर्वी संतोष सखाराम बढेकर (वय ४७) रा. रांजणी ता. आंबेगाव जि. पुणे यांचा मृत्यू झाल्याचे डॉक्टरांनी घोषित केले. याबाबत रमेश किसान बढेकर (वय ३२) रा. रांजणी ता. आंबेगाव जि. पुणे यांनी शिक्रापूर पोलीस स्टेशन येथे खबर दिली असल्याने शिक्रापूर पोलिसांनी अज्ञात वाहन चालकावर गुन्हे दाखल केले असून सदर गुन्ह्याचा पुढील तपास पोलीस निरीक्षक हेमंत शेडगे यांच्या मार्गदर्शनाखाली पोलीस हवालदार राजेश माने हे करत आहे.