शिक्रापुरात खिडकीतून प्रवेश करत चोरी; गुन्हे दाखल

शिक्रापूर (शेरखान शेख): शिक्रापूर (ता. शिरुर) येथील सान्वी रेसिडेन्सी सोसायटीमध्ये राहणाऱ्या एका व्यक्तीच्या घरात खिडकीतून प्रवेश करत घरातील लॅपटॉप व मोबाईल अज्ञात चोरट्यांनी चोरुन नेल्याची घटना घडली असल्याने शिक्रापूर पोलीस स्टेशन येथे अज्ञात 2 युवकांवर गुन्हे दाखल करण्यात आले आहे.

शिक्रापूर (ता. शिरुर) येथील सान्वी रेसिडेन्सी सोसायटीमध्ये राहणारे अमोलकुमार तोरडमल हे रात्रीच्या सुमारास मोबाईल चार्जिंगला लावून घरात झोपलेले होते. सकाळच्या सुमारास त्यांनी पत्नीकडे मोबाईल मागितला. त्यावेळी पत्नीला त्यांचा मोबाईल मिळून आला नाही.

त्यामुळे त्यांनी पत्नीच्या मोबाईल वरुन फोन लावून पाहण्यासाठी पत्नीचा मोबाईल पहिला तर पत्नीचा देखील मोबाईल मिळाला नाही. त्यावेळी पाहणी केली असता त्यांच्या घराची खिडकी उघडी असल्याचे तसेच टेबलवरील 2 मोबाईल व लॅपटॉप चोरीला गेल्याचे दिसून आल्याने त्यांनी सोसायटीचे CCTV तपासले असता दोन युवकांनी खिडकीतून प्रवेश करत चोरी केल्याचे निदर्शनास आले.

याबाबत अमोलकुमार भाऊराव तोरडमल (वय ३६) रा. सान्वी रेसिडेन्सी शिक्रापूर (ता. शिरुर) जि. पुणे मूळ रा. कर्जत ता. कर्जत जि. अहमदनगर यांनी शिक्रापूर पोलीस स्टेशन येथे फिर्याद दिली असल्याने शिक्रापूर पोलिसांनी 2 अज्ञात युवकांवर गुन्हे दाखल केले असून सदर गुन्ह्याचा पुढील तपास पोलीस निरीक्षक हेमंत शेडगे यांच्या मार्गदर्शनाखाली पोलीस नाईक संतोष मारकड हे करत आहे.