राज्यात एसटी कर्मचाऱ्यांवर हल्ले सुरुच; रांजणगावजवळ लोखंडी रोडने वाहकावर हल्ल्याचा प्रयत्न

रांजणगाव गणपती (तेजस फडके): राज्यात एसटी महामंडळाच्या कर्मचाऱ्यांवर होणाऱ्या हल्ल्यांची मालिका काही केल्या थांबत नसुन असाच एक धक्कादायक प्रकार पुणे-अहिल्यानगर महामार्गावरील रांजणगाव जवळ घडला. काही अज्ञात व्यक्तींनी थेट लोखंडी रोड घेऊन एसटीच्या वाहकावर हल्ला करण्याचा प्रयत्न केला. मात्र, स्थानिक नागरिकांच्या सतर्कतेमुळे वेळेवर हस्तक्षेप करण्यात आल्याने मोठा अनर्थ टळला.

या प्रसंगात वाहक सुखरुप बचावला असला तरी या घटनेने एसटी कर्मचाऱ्यांमध्ये भीतीचं वातावरण निर्माण झालं आहे. रात्रंदिवस प्रवाशांच्या सेवेकरता झटणाऱ्या कर्मचाऱ्यांवर असे हल्ले होणं अत्यंत चिंताजनक आहे. पोलिसांनी घटनास्थळी तात्काळ धाव घेऊन चौकशी सुरू केली असुन हल्लेखोरांचा शोध घेण्यात येत आहे. यावेळी स्थानिक नागरिक व प्रवाशांनी या प्रकाराचा तीव्र निषेध केला असुन एस टी कर्मचाऱ्यांच्या सुरक्षिततेसाठी कठोर उपाययोजना करण्याची मागणी करण्यात येत आहे.