शिरूर तालुक्यात दारूच्या नशेत महिलेवर चाकूने वार, तालुक्यात महिलांच्या सुरक्षितेचा प्रश्न पुन्हा ऐरणीवर

शिरूर (अरुणकुमार मोटे): शिरूर तालुक्यातील सरदवाडी येथे दारूच्या नशेत एका तरुणाने महिलेवर चाकूने हल्ला केल्याची धक्कादायक घटना घडली आहे.

शिरूर पोलिसांनी दिलेल्या माहितीनुसार, फिर्यादी वनिता अशोक सनन्से (वय २६) रा. सरदवाडी, ता. शिरूर, मुळ रा. बोराखेडी, ता. मोताळा, जि. बुलढाणा या त्यांच्या बहिणीच्या घरासमोर बसल्या असताना आरोपी राहुल तुकाराम माळी ( रा. सरदवाडी, मुळ रा. बोराखेडी) हा दारूच्या नशेत येऊन मला जेवायला दे, नाहीतर पैसे दे, मला गावाकडे जायचंय अशी मागणी त्याने वनिता यांच्याकडे केली असता वनिताने पैसे नसल्याचे त्याला समजावून सांगितले असता आरोपीने संतापून तिच्या छातीवर आणि हातावर चाकूने वार करून एवढ्यावर न थांबता आज तुला मारूनच टाकतो अशी धमकी देत शिवीगाळ केली आहे.

या प्रकारामुळे परिसरात एकच खळबळ उडाली असून वनिता गंभीर जखमी झाली असुन पोलिसांनी वनिताच्या फिर्यादीवरून राहुल माळी याच्याविरुद्ध गुन्हा दाखल केला असुन या प्रकरणाचा पुढील तपास शिरूर पोलीस स्टेशनचे पोलीस निरीक्षक संदेश केंजळे यांच्या मार्गदर्शनाखाली पोलिस हवालदार कळमकर हे करत आहेत. काही दिवसांपूर्वीच कारेगाव पोलिस स्टेशनच्या हद्दीत एक महीला व मुलांना जिवंत जाळण्यात आले होते. गुंड प्रवृत्तीच्या लोकांना कायदयाचे भय राहीले नसून शिरूर तालुक्यात महिलांच्या सुरक्षिततेचा प्रश्न पुन्हा एकदा ऐरणीवर आला असून अशा आरोपीवर कठोर कारवाईची मागणी होत आहे.