शिरुरच्या सार्वजनिक बांधकाम विभागाचा प्रताप, विनापरवाना झाडे पाडत केले बांधकाम; कारवाई करा, नागरीकांची मागणी

शिरुर (अरुणकुमार मोटे) कवठे येमाई (ता. शिरुर) येथील गट न.२६७ मध्ये वनविभागाची परवानगी न घेता सार्वजनिक बांधकाम विभागाने निलगिरी, सिसम, लिंब अशी दहा झाडे पाडुन अनधिकृत बांधकाम केले आहे. याबाबत वृक्षप्रेमींनी तीव्र निषेध व्यक्त केला असुन कोणतीही परवानगी न घेता मोठी झाडे तोडल्यामुळे सार्वजनिक बांधकाम विभागाच्या आधिकाऱ्यांवर वनविभागाने कारवाई करण्याची मागणी होत आहे. याबाबतची माहीती कवठे येमाई येथील ग्रामस्थ शरद उघडे यांनी दिली आहे.

तसेच जिल्हाधिकारी यांची कोणतीही परवानगी न घेता सार्वजनिक बांधकाम विभागाने सदर ठिकाणी बांधकामही केले असल्याचा आरोप शरद उघडे, अमर उघडे यांनी केला आहे. जर शासकीय आधिकारी नियम डावलुन बेकायदेशीरपणे वृक्ष तोडत असेल तर याला वेळी चाप बसणे गरजेचे आहे.

शिरुरचे तत्कालीन गटविकास अधिकारी अजित देसाई यांनी काही महीन्यांपुर्वी शिरुर पंचायत समिती आवारातील वृक्ष कापले होते. त्याविषयी सामाजिक कार्यकर्ते व वृक्षप्रेमी नाथा पाचर्णे यांनी आवाज उठवत त्यांच्यावर कारवाई करण्यास भाग पाडले होते. आता वनविभाग व जिल्हाधिकारी साहेब सार्वजनिक बांधकाम अधिकाऱ्यांवर कारवाई करणार का…?की राजकीय हस्तक्षेपामुळे त्यांना पाठीशी घालणार हे पाहणे महत्वाचे ठरणार आहे.

याविषयी वनपरीक्षेत्र आधिकारी प्रताप जगताप यांच्याशी संपर्क साधला असता ते म्हणाले की या गट नंबरमध्ये वृक्ष काढण्याची कुठलीही परवानगी काढलेली नाही. त्यामुळे रीतसर पंचनामा करण्यात येईल आणि संबंधितांवर योग्य ती कारवाई करण्यात येईल.

शिरुर-पाबळ रस्त्यासाठी होतोय चक्क मातीचा वापर; सार्वजनिक बांधकाम उपविभाग निद्रीस्त