अंशकालीन स्त्री परिचरांना दिलासा; मानधनात दुप्पट वाढ, एप्रिलपासून ६ हजार रुपये

मुंबई: सार्वजनिक आरोग्य विभागाच्या आरोग्य उपकेंद्रांमध्ये कार्यरत अंशकालीन स्त्री परिचरांच्या मासिक मानधनात दुप्पट वाढ करण्याचा महत्त्वपूर्ण निर्णय घेण्यात आला आहे. १ एप्रिल २०२६ पासून ही वाढ लागू होणार असून, यासंदर्भातील शासन निर्णय जारी करण्यात आला आहे.

गाव पातळीवर, विशेषतः आदिवासी, दुर्गम व डोंगराळ भागात प्राथमिक आरोग्य सेवा तळागाळापर्यंत पोहोचवण्यात अंशकालीन स्त्री परिचरांची भूमिका महत्त्वाची आहे. विविध आरोग्यविषयक योजनांचा लाभ प्रत्येक कुटुंबापर्यंत पोहोचवण्याचे कामही त्या प्रभावीपणे पार पाडतात.

२०१९ च्या शासन निर्णयानुसार या परिचरांना दरमहा ३ हजार रुपये मानधन दिले जात होते. मात्र, कामाचे वाढते स्वरूप, आरोग्य सेवेत वाढलेली जबाबदारी आणि महागाईचा विचार करता आरोग्यमंत्री प्रकाश आबिटकर यांनी पुढाकार घेत त्यांच्या मानधनात ३ हजार रुपयांची वाढ करण्याचा निर्णय घेतला आहे. त्यामुळे आता त्यांना एकूण ६ हजार रुपये मासिक मानधन मिळणार आहे.

या निर्णयाची अंमलबजावणी करताना सर्व जिल्हा परिषदांनी प्रचलित कार्यपद्धतीनुसार सुधारित मानधन देण्याचे निर्देश देण्यात आले आहेत. तसेच प्रत्येक महिन्याच्या दहाव्या तारखेपर्यंत मानधन अदा करण्याचेही आदेश आहेत.या निर्णयामुळे राज्यभरातील अंशकालीन स्त्री परिचरांमध्ये समाधानाचे वातावरण निर्माण झाले आहे.