लग्नाआधी लोकशाहीच कर्तव्य! शेरवानीत नवरदेव थेट मतदान केंद्रावर

कान्हूर मेसाई (सुनिल जिते): शिरूर तालुक्यातील संवेदनशील असणाऱ्या रांजणगाव -कान्हूर मेसाई या गटात ‘काटे की टक्कर’ चाललेल्या मतदानात एका-एका मतांचा विचार होत आहे. अशाप्रसंगी आज स्वतःचं लग्न असतानाही ‘आधी मतदान, मग लग्न’ असं ठरवून नवरदेव गणेश खर्डे यांनी चक्क आपला मतदानाचा हक्क बजावला. याची चर्चा कान्हूर मेसाईमध्ये दिवसभर रंगली.

कान्हूर मेसाई येथील जि.प शाळेत या नवरदेवानी मतदान केले. सायं सहा वाजता स्वतःचं लग्न असतानाही आणि घरात लग्नाची लगीनघाई असतानाही वेळात वेळ काढून आपल्याला घटनेनं दिलेला मतदानाचा अधिकार प्रथम बजावायचा, असा मनोदय नवरदेवनं केला आणि त्याप्रमाणं लग्न मंडपात जाण्याआधी वेशभूषा परिधान करून,हा नवरदेव मतदानासाठी हजर झाला.

दरम्यान, रांजणगाव – कान्हूर गटातील येथील निवडणूक ही संवेदनशील म्हणून परिचित असताना एका-एका मतदानाचा हिशोब लावला जात आहे. अशा परिस्थितीत हे मतदान झाल्यानं या घटनेची चर्चा कान्हूर मेसाई येथे घडून आली.